Ramin total bandh a ṭhatpui em

Mizorama eptu party MNF chuan October 29, 2025 khan Mizoram pum huapin Forest (Conservation) Amendment Act, 2023 leh Mizoram sorkarin a pawm (adopt)-na dodalna lantirin total bandh an huaihawt a; zing dar 6 aṭanga tlai dar 4 thleng neih tur ni mah se, chawhnu dar 1-ah tihtawp a ni.

Rorel lai party, ZPM Ṭhalai erawh chuan MNF-in total bandh an huaihawt chu Dampa biala MLA by-election neih dawn boruakah mipui mithmuha MNF party lansarh duhnaah an puh thung. Bandh nía MNF President-in bandh chu Dampa bialah au ring tak tur a nih an rin thu a sawi ngaihtuahin, ZPM Ṭhalaite'n an puhna hi thil ni ve thei tak a ni.

Total bandh huaihawt a nih hian a bikin khawpuiah mipui tam zawk an che chhuak thei lo a, hna thawh theih a ni lo; sorkar hna pawimawh tak tak a châwl a, zirna zawng zawng khâr a ni ṭhin. Hei vang hian bandh hi mipuiin an tuar thei a, a bikin ni tina sum lak luh hmanga khawsate'n an tuar ṭhin. Supreme Court pawhin total bandh hmanga tihluihnaa mipui dan beh a khap tawh.

Total bandh-a thil awm dan ngaihtuahin, total bandh hi ramin a ṭhatpuina aiin a ṭhatpui lohna a tam zawkin a hriat a, tih fo loh theih ni se a duhawm, Mizoram mipui tam ber duh dan pawh a nih a rinawm.

Bandh huaihawt a nih avangin sorkarin FCAA 2023 pawm tawh an sût phah ang em, sût a nih theih nan Assembly session an koh phah ang em, tihte hi ngaihtuah tham tak a ni. Session chu ko ta pawh ni se, MLA zingah FCAA duh lotu party MLA-te an tlem zawk avangin sût a ni kher lo thei bawk.

FCAA 2023 hi duh lo tam tak an awm ang bawkin, duh lo lem lo, Mizorama hman pawi ti lo tam tak dang an awm ve bawk a, ngaihdan a inang lo a ni tih hi hriat a pawimawh.

FCAA hi political ball a ni tawh a, political party tinte FCAA chungchanga hma an lak danah leh an sawi danah an fimkhur a ṭul. Thil nihna dik tak ni si lo, thu dik tâwk lo dawn vanga ni anga ngaih tlatna awm thei a nih avangin mipui pawhin FCAA nihna tak an zir chian a, an hriat chian a ṭul bawk.