Kawng ṭha leh tlo tak siam ni ngei se
Mizoram PWD hnuaiah Nidhi Creative Infrastructure-in October 30, 2025 zan khan Aizawl chhung kawngpui siamṭhat (resurfacing) hna an thawk ṭan a, siam ṭan zanah hian PWD Minister-in a enpui nghe nghe.
Kawng siam ṭan zanah hian PWD Minister chuan, Aizawl khaw chhung kawng siam ṭan takah hian kawng siamna khawl lian (paver machine) kal theihna chinah kawng ṭha tak siam hmasak tum a nih thu te, paver kal theih lohna, wheelbarrow kal theihna chin kawngte pawh siam vek tum a nih thu te, kawng quality ṭha siam a nih dawn thute sawi.
Mizoramah ruah a tla rei ṭhin a, ruahtui hul hun chhung a rei tâwk lo. Khaw tuihul laia thawh chi hna tam tak thawh hun chhung a rei tâwk lo a, hna thawh theih hun chhungin chak taka hna thawh a ṭul ṭhin.
Kuminah pawh ruah a tla rei viau. Tunah chuan favâng hun a zo a ni ber tawh a, thlasik a inṭan mai dawn; khua a tuihul chho mai tawh dawnin a lang. State sorkar leh PWD lamin Aizawl khawpui chhunga kawngte thawm ṭhat hna an thawk chho ṭan ta pawh hi a lawmawm.
Nikum lam khan Aizawl hmar lamah khawpui chhung kawng siam a ni a, mahse, kawng siamte chu a tlo lo a, a hnu lawkah a khawk leh mai. Kawng an siam tawh china eng emaw zat chu siam a nih hma ai mahin a chhe zawk a ni.
Aizawl khawpui chhung kawng siam mek hi nikum lama siam ang maia a tlo lo a nih tawh lohna turin, kawng tlo tak siam ngei turin uluk takin kawng siamtu company-in hna thawk se, PWD lam pawhin ṭha takin vil se, siam dan tura tih ang taka an siam ngei theih nan enpui rawh se.
Kawng siam a nih lai chuan kawngpui dan a ngaih cháng te, harsatna eng eng emaw a thlen chángte a awm ṭhin; hetiang hi mipui lamin hriatthiam a ṭha. Thil ṭha a thlen dawn hian tawrh a ṭul hun lai a awm fo a, chungte chu tawrh chhuah ve a ngai ṭhin.
Aizawla kawng siam chhoh mek hi a tlo zawk theih nan kawng siam mekna leh a chhehvela awm mipui te, a bikin khawtlang hruaitute an pawimawh fo. Kawng siamna hmuna khawtlang hruaitu - local council-te leh NGO-te'n uluk takin lo vilpui thei se, awmzia a nei hle ang.