Ṭangkai zawka tualṭo mau hman

Horticulture Minister chuan tun hnai khan media mite'n an kawmnaah, "Kan mau neih sate a ṭha thawkhatah kan ngai. Mau chìn pun tum vak lam aiin kan neih sate ṭangkai taka hman kan duh a, chumi hawi zawng chuan kan kal," a ti. Hemi rual hian sorkar hmasain state pawn aṭanga mau a lak luh leh a chinte chu a puitlin theih nan hma an lak thu pawh a sawi.

Hun kal tawhah Mizoram pawn aṭanga mau lian chi lak luh thu te, Brandisii, Latiflorus tihte a lâr hle. Mizoram hmun ṭhenkhatah chîn a ni a, tuna a dinhmun te, a puilting thei dawn em tihte hriat mai theih a ni lo a; ṭha takin puitling se, a chingtute'n hlâwkpui ngei se a duhawm. A puitlin theih nan hma an lak thu Minister-in a sawi pawh hi a lawmawm.

Mâwlmang taka ngaihtuah chuan, state páwn aṭanga mau/rua lâk luh hi ram leilung nen a inmil tâwk lo thei. Tu'ma chìn ni loa Mizorama awm sa, a tualṭote hi Mizoramah a ṭha duh ber ang tih a rin theih a, mau aṭanga hlâwkna hmu tur pawhin kan rama tualṭote hi a ṭha berin a rinawm.

Mizoramah hian mau a tam viau a, mahse, tun dinhmunah chuan Mizoram mipui hian kan la hmang ṭangkai tâwk lo a, kan la hlâwkpui tawk lo. Tun hma aṭanga Mizote'n kan lo hman ṭangkai ṭhin dan piah lamah, bungrua siamna atan te, meihawl leh vinegar siamna atante hman theiha sawi a ni a; hetiang lamah hian hman ṭangkai a nih theih nan sorkarin chak zawka hma a lak a ngai a ni.

Horticulture Minister-in Mizorama mau awm sate ṭangkai taka hman an duh a, a hlâwkna hmu thei tura hman ṭangkai an tum thu a sawi hi a lawmawm. Sawiah tawp mai loin, a taka chak taka bawhzui a pawimawh.

Kum kal taah khan Horticulture Minister hmasa leh official ṭhenkhatin mau hman ṭangkai dan tur Taiwan-ah an ngaihven a, mau an sâwngbâwl dante an han zir a ni.

Taiwan-a mau hman ṭangkai dan tur leh sâwngbâwl dan tur an han zirte kha a zûzî mai ang tih a hlauhawm a, zûzî mai loa a hlawhtlin ngei theih nan leh, Mizorama mau awm sate hi ram leh mipuiin an hlâwkpui zawk theih nan awmze nei taka chak zawka hmalak a ngai a ni.