Aizawl-Sairang inkara MST bus tlân

November 1, 2025 khan Sairang rel chawhhmun aṭanga zin chhuak tur zinga Aizawl aṭanga MST bus hmanga Sairang pante chuan bus a tlai avangin rél an nang lo a, hei hian sawi zui a hlawh hle.

Sairang chawlhhmunah MST bus a thlen tlai avanga mi eng emaw zat rêlin a tlansan kha a zialo tak zet a, pawisa eng emaw zat an chawi thlâwn tihna a ni a, ṭhenkhat chu thil pawimawh tak tak ti turte an ni thei; an khawngaihthlak hle a ni.

MST bus a thlen tlai vanga mi eng emaw zatin rél an nang lo hi mi tam takin an sawisel a, sorkar leh Transport department an dem a; sawisel tur zawng ngar ngarte tan phei chuan chaw ṭha tak a ni ang.

Transport Depatment-in bus tlai chhan an sawifiah nghal a; MST bus chu chhuah hunbi pangngaiah a chhuah thu te, chhuah hun pangngaia a chhuahin ni dangah chuan an tlai ngai loh thu te, November 1, 2025-ah erawh chuan traffic jam a nasat avangin an tlai phah tak thute an tarlang. Thupha an chawi nghal bawk.

MST bus tlai chungchangah hian social media-a thu lêngvâka innghat, thil nihna dik tak hre chiang si loa sawiselna thu thehdarh an tam a; mi tam tak chuan MST bus enkawltute thiam loh an chantir nghal a ni. Mahse, sawiseltu tam ber chuan bus chhuah hun te, bus tlai chhan dik takte an hre lem lo tih a lang.

Transport department hotute chuan MST bus tlai vanga miin rêl an nan loh tawh loh nan hma an la nghal a, bus chhuah hun darkar khatin an sawn hma. He hmalakna hi a lawmawm a, mipui tan thil ṭha tak a ni.

Sairang thlenga rêl a tlan tawh vanga Aizawl-Sairang inkara MST bus a tlan hnuah November 1 thlengin MST bus vawi 79 an tlan tawh a, mi 3,196 an phur tawh. Chawhrualin bus vawi khat tlânin mi 40 chuang hret (40.45) zel a phur ang a ni.

MST bus-in rél hmanga zinte a phurh zat chawhrual enin, MST bus hi mipuiin an bawh a, an hmang ṭangkai hle tih a lang. Mipuiin senso tlem zawka Aizawl leh Sairang station inkara an kal theih nan MST bus tun aia tam tlantir theih ni se a duhawm.