Dan ang taka lakte chauh dah ngheh

Centrally sponsored scheme (CSS) hnuaia Mizoram sorkara thawkte dah ngheh theihna dan, Regularisation of CSS Employee Scheme, 2024 hmangin Mizoram sorkarin checklist a siamṭha a, checklist thar peih thawkhat a ni tawha sawi a ni.

Mizoram sorkara CSS hnuaia thawkte hian dah ngheh phûtin lungawi lohna an lo lantir tawh ṭhin a, kuminah pawh hun eng emaw chen lungawi lohna an lantir a ni.

All Mizoram CSS Employees Coordination Committee (AMCECC) chuan CSS hnuaia thawkte zingah dan loa lak an awm lo niin an sawi ṭhin. Sorkar erawh chuan dan loa lak eng emaw zat an awm ngeiah a ngai a, dan loa lak an awm thu sorkar hotute'n an sawi tawh ṭhin.

AMCECC huaihawta lungawi lohna lantira hun eng emaw chen hna an thawh duh loh hnuah sorkar hotute nen an inbiakna angin sorkarin checklist a siamṭha a ni. Checklist siamṭhat peih a ni dawn hnai ta hi a lawmawm a, sorkar leh CSS hnuaia thawkte harsatna chingfeltu ni ngei se a duhawm.

Checklist siamṭhat a nih dawn avang hian CSS hnuaia thawk zinga mi eng emaw zat chuan dan ang taka lak an nihzia finfiahna atan lak an nih dawna chanchinbua advertisement chhuak an zawng hlawm a, advertisement chhuahna copy hmu chhuak ta pawh eng emaw zat an awm. Advertisement zawn tur nei ve lem lo pawh an awm ngei ang.

Hengte hian advertisement chhuaha dan ang taka lakte an awm ngei a ni tih a tichiang àwm e. Dan loa lak, induhsakna vang liau liaua lak mi eng emaw zat an awm tih hi mipui náwlpui hriat dan a nih a rinawm. AMCECC pawhin CSS hnuaia thawkte zingah dan ang taka lak ni lo, dan loa lak, advertisement chhuah loh leh interview chhuah loa lak eng emaw zat an awm ngei tih an pawm a hun tawh.

CSS hnuaia thawkte zingah dan ang taka lak, hun rei tak thawk tawh mi tam tak an awm. Dan ang taka lakte state sorkara dah ngheh theihna turin sorkarin dan a siam tawh bawk. Hetiang a nih avang hian dan ang taka lakte chu sorkar hian a remchan angin, a tahtawla a dah ngheh a ṭha ang.

CSS hnuaia thawkte dah ngheh a nih dawn pawhin, dik tak leh dan ang taka lakte chauh dah ngheh ni se, chutiang tur chuan huaisen takin sorkar kal zel rawh se.