Study team rawtna hnawl

General Purpose Committee (GPC)-in MLA-te hlawh san dan tur zir chiangtu tur study team a din a; nimahsela study team rawtna chu a vaia hnâwl a nih hnuah GPC ruat thar member pathum awmna sub-committee rawtna zawk chu GPC-in a pawm a, Mizoram Assembly session-ah November 22, 2019 khan MLA-te hlawh punna tur bill pass a ni. 

Mizoram sorkar hnuaiah hian thil hrang hrangah mithiam bikte awmna study team hi din a lo ni tawh ṭhin a, heng mithiamte rawtna hian ngaih pawimawh a hlawh loh chang a tam hle. Tun hnaiah MLA-te hlawh punna tur pawh a âwm tawka siam a nih theihna turin a zir chiangtu tur an din a, anni hian state dang MLA-te hlawhte leh thil dang a kaihhnawihte nen an zir chiang a, rawtna an thlen chu GPC-in a pawm lo.

GPC lamin MLA nilai, a hlawh latu tur ṭhiau awmna sub committee a din leh a, chu mite rawtna ang chuan MLA-te hlawh, an pension leh an hamṭhatna dang chu pharh a ni ta a, chu zawk chu a tlang ta a ni. He thil hian nghawng lian tak a nei chhunzawm ngeiin a rinawm a, kan dan siamtu, anmahni hlawh bi intuksak theitu rualin an hlawh pun dan an rel a, a hmaa an hlawh let aia tama an tipung duh hian mipui sawi a hlawh zui hle. An hlawh pun a ṭul chhan lian takah mipuiin an puh lêt hlauh a, kan MLA-te hian an bial mipuite hi phurrit angin an hmu ta hial tiin a thlir theih ang.

MLA rualin an hlawh tihpun dawna an sawi  MLA nih a hautsakzia hi tlang hriat a ni a; nimahsela chumi huama kum khat pawh la tling loa mahni ngei pen chhuaka in-candidate an ni hlawm a, a hnu lawka a zir chiangtute zir chhuah sa hnawl veka anmahni hlawh tur an insiamchawp hian kan ram kal zel turah nghawng ṭha lo zawk a neih a hlauhawm ngawt mai.