Ṭawng humhalh duhna

Mizoram Ṭhalai Kristian Pawl (MṬKP) Rorel Inkhawm vawi 66-na tun hnaia Serchhipa neih chuan, "Mizo ṭawng humhalh leh tih hmasawn a nih theihnan MṬKP-in hma la rawh se," tiin an rel. 

Tun hnaiah Mizoram Synod Inkhawmpuiin ṭawng humhalh duhna lam hi an lo rel tawh a, tuna ṬKP-in ṭawng humhalhna lam bawk an ngai pawimawh hi thil lawmawm tak a ni. Hei hian tun hnai­ah mahni ṭawng humhalh duhna a lian thar hle tih a chiang a, heti taka kohhran huang thlenga ṭawng humhalh duhna a awm hi chuan awmzia a nei ngei ang tih a chiang. 

Mizote'n kan ṭawng hman tlanglawn ber, kan ṭawng hmanlai ngei pawh hi a hming kan pawm dan a inang lo phawt a, 'Duhlian ṭawng' ti an awm a, 'Lusei ṭawng' ti an awm bawk a, a nawlpuiin an hman tlanglawn chu Mizoṭawng tih a ni. Chumi piah lamah kan khawsakna hmun azirin kan ṭawng kauchheh a inang lo a, "A dik," kan tih leh, "A dik lo," kan tih chin pawh a inang hleithei lo. 

Engpawhnise heti taka kohhran huang chhunga Mizoṭawng humhalh duhna a awm ta hi kan hman dan a dik loh nasat tak avang te, hnam dang ṭawng (a bikin English) kan ngaihsan leh kan hman nasat luat avanga mahni ṭawng dik leh dik lo pawh hre hrang mang loa kan awm tak vangte hi a ni thei ang. Tun hnaia social media a chhuah hnuah phei hi chua ṭhangthar zawkte hian Mizo ṭawng hi an thiam tawk lo hle tih a lang chiang lehzual. 

Tuna humhalh duhtu kohhran ngei pawh hi Mizo ṭawng dik lo hman chungchangah hian a bang bik lo a, midangte hnena ṭawng dik zirtirna hmun ṭha ber pakhatah hian ṭawng dik lo hman a awm fo avangin mipui nawlpui hi a dik lo lamah a kaihruai ve thei a ni. 

Engpawhnise Mizo ṭawng humhalh duhna kan nei chho ta zel hi a lawmawm a, hei hian kan ṭawng humhalh, tihhausak leh hman dik kawngah hna ṭangkai tak a thawk ngei ang.