Bial hmasawn nan ṭan la zui se
Dampa biala Assembly by-election vote thlâk leh vote chhiar te buaina leh harsatna awm loin tluang taka zawh a ni ta a, MLA atana thlan tlin pawh kan hre ta. Inthlan leh a kaihhnawihah hian tih tur leh tih loh tur tam tak a awm a, tluang taka zawh a ni thei hi a lawmawm hle.
Inthlana mawhphurhna nei zawng zawngte'n an tih tur ṭheuh ṭha taka thawkin an hlen chhuak niin a hriat a, a lawmawm. Inthlan chuhtu political party-te leh an candidate-te bakah, Dampa bial mipuite'n an tih tur ṭheuh ṭha takin an ti a, a lawmawm hle a ni.
Hun laklawha inthlan hi rorel lai party chan tura ngaih a ni fo a, tling ngei tura ngaihna a awm ṭhin. Mizoram chanchinah by-election-ah eptu party an chak zauh cháng awm ve bawk mah se, rorel lai party an chak ṭum a tam zawk viau.
Dampa by-election-ah erawh chuan eptu party zinga mi MNF an chak. Mipuiin candidate nihna leh dinhmun an en viau niin a lang a; hei hi political party-te tan rilrua vawn zui reng chi a ni ang. Tun by-election-a chak ta party tan hnehna an chan hi a lawmawm zual hlein a rinawm a, inthlanpui hmachhawn leh turin phûrna nasa tak a pe ngei ang.
Rorel lai party tan erawh Dampa by-election-a an tling zo lo hi mualphona a tling; inenfiahna tur tam tak a awm ang. Kum hnih dáwn sorkar an kalpui tawh danah mipui an lungawi tâwk lo tih a hriat theih a, hei hi pawm ngam se, insiam ṭhat nan an hman thiam a, ṭha lehzuala ram an enkawl a pawimawh dawn a ni.
Dampa bialtu MLA atana thlan tlin tak pawhin bial hmasawnna turin theihtawp chhuah zui se; a lakah bial mipui pawhin beiseina sang tak an nei dawn. Vote hmuh ṭhatna leh hmuh ṭhat lohna polling station-te thliar loin, an mamawh ang zelin hma lakpui se a ṭha hle ang.
State sorkar pawhin Dampa bial hi opposition bial ni zui zel dawn mah se, thlahthlam lo se, opposition bial a nih avanga hrêk duhna rilru pu lo se. Inthlan campaign laiin Dampa biala hmasawnna hna thawh tur eng eng emaw sawi rîk a ni a, kha'ngte kha bawhzui zel se, bial hnufual a nihna aṭanga khaichhuak turin hma la zui zel rawh se.