Lirthei che vêl enkawlnaa ṭan lak

Aizawl Traffic SP chuan tun hnai khan MJA hruaitute nen an inkawmnaah, January-October 2025 chhungin Aizawlah lirthei dan bawhchhia 7,864 an man a, chunga sum chawi belh khawm chu Rs 69,95,900 a nih thu a sawi.

Mizoramah lirthei a pung chak em em a, a la pung zel dawn. Aizawl khawpui chhunga lirthei che vêl enkawl pawh a hautak hle ang tih a chiang a, a la hautak zual zel pawhin a rinawm.

Khawpuia lirthei che vel enkawl hautak tak hi inthlahdahsan loa ṭan mar pát a ngai. Traffic police-te'n theihtawp an chhuah ṭhin a, a lawmawm a; tun hnaiah pawh Mizoramin chawimawina a dawng hial. Inpekna thûk zawk nen rim leh zuala thawk turin rilru siam se, nasa lehzuala ṭan an lâk sauh sauh a ṭul.

Lirthei che vel enkawl hi hautak zual zel tur a nih avangin sorkarin a ngaih pawimawh lehzual a ngai. Traffic police-te hi an indaih tâwk lo ṭhin a, sorkarin thawktu a dah belh zel a ṭul ang a, hmanraw lamah pawh a thuam chak zel a ngai.

Khawpuia traffic dan leh thupek kenkawh ṭhat a pawimawh em em; dan leh thupek bawhchhiatna rau rauah mi dang tana harsatna thlen thei bikte a awm a, chungte chu hriat chian a pawimawh.

Two wheeler-a chuangte tan lukhum (helmet) ṭha khum a ṭhat rualin, a ṭha lo deuh khumin mi dang tan harsatna a thlen lo. Tlân loh nia lo tlân chhuak mi tlemtête hian harsatna sawi tham an thlen lêm lo. Hengte hi vil ṭhat a pawimawh rualin, a aia ngaih pawimawh hmasak tur leh vil ṭhat ngai zawk dan leh thupek bawhchhiatna, mi dang tana harsatna thlen thei a awm nual.

Lirtheia exhaust pipe ring lutuk vuah hian mi dang tan harsatna nasa a thlen thei a; hetiang hi traffic police-te'n an ngaimawh lehzual a, tirêm tura nasa zawka hma an lâk a ngai. Lirthei khalh chunga phone khawih leh hman hi phal loh a nih laiin, hmang hmuh tur an tam; mahni tana a him loh bakah mi dang tana harsatna thlen ṭhin a nih avangin vil uluk zual a ṭul.

Mipui pawhin lirthei kaihhnawiha dan leh thupekte an ngaih pawimawh a, ṭha taka zawm a pawimawh tak zet. Dan loa thil tih hian mi dang tan harsatna a thlen ṭhin a ni tih hria a, dan ang taka lirthei khalh ṭul a ni.