Sumdawngte zing zawka endik

Legal Metrology leh Centre for Consumer Education, Mizoram chuan November 11, 2025 khan The Legal Metrology Act, 2009 hnuaiah Aizawl Bazarpuia sa zawrhnaah bûkna an hmante a dik leh dik loh an enfiah.

Bûkna endiknaah hian sa chi hrang hrang hralh tur an bûk lai endik a ni a; sa zuartute'n bûkna an hman chu a dik tlangpui niin an hmu a ni. Endiktute chuan digital khawl hmangtute chu an khawlte thuneitute endiktir ṭhin turin an chah.

Aizawl leh Mizoram hmun hrang hrangah thil zuartute'n bûkna an hmante a dik tawh loa sawi a ni ṭhin a; chutih laia Aizawl Bazarpuia sa zuarte'n bûkna an hmante a dik tlangpuia hmuh a ni hi a lawmawm.

Sumdawng zingah mi rinawm tak tak, bûkna dik tak hmang ṭhin mi tam tak an awm a; chutih laiin, bûkna dik lo hman hreh lo leh dik lo taka mipui sum lak tum tum tlat mi eng emaw zat an awm ṭhin bawk.

Bûkna leh tehna dik lo hman a nih a, thil a nih dan tur ni pha loa dawrkaite'n mipui an leitir hian mipui an rawk tihna a ni a, eirûkna a ni. Hetiang hi Pathian ringtute thil tih dan tur a ni lo a, Kristian ram nihna nen a inhmeh lo.

Bible-ah chuan, "Bûkna dik lo hi Lalpa mithmuhin thil tenawm a ni a, khîn dik chiah erawh chu a lâwm zâwng a ni," tih a ni. Thil zuartu, Mizo Kristiante'n bûkna dik tak an hman a, dik taka mipui hnena thil an leitir hi an mawhphurhna leh an tihmâkmawh a ni a; hei hi sumdawngte'n hre reng se a duhawm.

Inzirtirna ringawt hian mi zawng zawng a siam ṭha thei lo a, thil dik lo ti an awm leh awm loh endik a ṭul ṭhin. Thil dik lo tite lakah dan anga thununna leh hremna lek a ṭul ṭhin bawk.

Aizawl leh hmun hrang hrangah sumdawngte'n dik taka mipui hnena thil an hralh theih nan thuneitute'n theihtawp chhuah se, dâwr leh sumdawnna bazar hrang hrangte endik fo se; mipuiin an chanvo dik tak an chan theih nan zing zawkin thuneitute'n sumdawngte endik ṭhin rawh se.

Mipui pawhin thil kan leiah dik lo kan hmu a nih chuan phun liam mai loin, thuneitute hnenah thlen nachâng hria ila, dan anga kan beih let ṭhin a pawimawh em em a ni.