Thu dik lo hmanga mi dangte beih

Kum hnih chuang kal taa Assembly Speaker-in PHE department-ah dik lo takin sorkar sum nuai 100 hman loha ziah bo a nih thu a sawi chhuah chu Lokayukta-in a chhui zui a, dik lo taka cheng nuai 100 hmanna a hmu lo a, thubuai a titawp.

Sorkar liam taa Speaker-in April 2023 khan USA-ah khatih laia Deputy Chief Minister enkawl PHE department-ah cheng vbc 100 hna thawh awm loa ziah ral a nih thu a sawi chhuak. MPYCC-in July 7, 2023-a ngenna an thlen angin Lokayukta chuan a chhui zui a ni.

Cheng nuai 100 ziah bo thu sawi chhuaktu hi Lokayukta-in thu a zawtfiah a, a hun laia PHE Minister pawh thu zawhfiah a ni. Speaker hlui insawifiahnaa hming langte chu Lokayukta-in thu a zawhfiah chhawng zel a; Speaker hlui thusawi chu thu dik lo a nih tih hmuin, a titawp ta a ni.

Lokayukta hi eirukna chhuitu niin, a thil chhui chhuahte chu rintlak tura ngaih a ni a; PHE-ah cheng nuai 100 hman loha ziah bo a awm nia sawi chungchang a chhuina pawh rintlak tura ngaih a ni.

Speaker hlui hian mi tute emaw thu sawi chu a dik leh dik lo hre si loin thil a sawi mai niin a lang a, a zialo hle. A thil sawi hi a lan danah chuan thil lian tham tak a ni a, nasa taka mi mualpho theihna a ni.

Chutiang a nih laia thil nihna tak hre chiang si loa sorkar sum nuai 100 ziah bo a awm anga thu dik lo mipui hriatah a hun laia Speaker meuhin a sawi nia lang ta hi a zialo hle a, a zahthlak a, a mualphothlak tel bawk.

Politics-ah hian political party-te leh politician-te an inbei ṭhin a, an insawisel fo a; chutih rualin, thu dik lo hmanga inbeihna a tam a, thu dik lo hmanga thu dik lo sawia inpuhna pawh a awm ṭhinin a lang. Thu dik lo leh dik famkim si lo, dik ni àwm taka lang thei, a hre chiang lote'n dik emaw tia an rin mai theih tura thu puarpawlêng sawite pawh a hluar viau; hetiang hi chin zui loh a ṭha khawp mai.

Political party-te leh politician-te hi ram leh mipui kaihhruai tum an ni a, thu dik tâwk lo sawi mai mai lo tur leh dâwt hmanga mi dangte bei lo turin mipuiin an beisei tak zet a ni tih an hriat a ṭul.