Hnam Rûn aṭangin AMC thunun

MPCC president Lal Than-hawla chuan, Aizawl Municipal Corporation (AMC) chu Mizo Hnam Rûn aṭanga thunun niin a sawi a, "MNF chauhin an chan theih nana control an ni," a ti.

Congress party hotupa thu-sawi hi politics thil a nih vangin a dikna leh dik lohna finfiah vek a harsa ang a, chuti chung chuan a dik thui khawp ang. AMC-ah hian MNF-in sorkarna an chan avangin a chhung hna awm thei ang ang hi an party mi leh sa induhsakna remchangah an hmang lo thei lo a; Hnam Runa ṭhu
ṭhin party hotute hi AMC-a nihna nei lo ni mah se party thu chu AMC-ah hian an dah pawimawh hle ang tih pawh a rin theih.

Hetihlai hian Mizoram sorkar hi ngun takin han en ve ta ila, Congress an sorkar avangin Congress Bhawan aṭangin an thunun tih loh rual a ni bik lo. Congress ho duh danin a kal a, roreltu an nih miau avangin induhsakna awm theiah an party mi leh sa an duhsak a, sorkar hnuaia contract leh supply hna lian azawng zawng deuhthawah an inrawlh lo thei lo.

Mizoram kalphunga pawi ber mai chu rorel lai party apiang induhsak a, eptu lamte an inhre chang lo ṭhin hi a ni. AMC pawh hian Aizawl khawpui chhung enkawltu an nih angin Aizawla mite hamṭhatna hi dah pawimawh ber se, chumi hnuah MNF lam an duhsak dawn a nih pawhin a hriatthiam theih. Chutiang bawkin Congress pawhin Mizoram an enkawl a, Congress party mi leh sa chiah an enkawl bik lo a ni tih hi hria se a ṭha khawp mai.

Politics kan kalpui danah hian kan inthlak thut a nih loh chuan kan ram hian a tuar zel dawn tih a chiang a, a pawi khawp mai. Party induhsakna hi a bo thei dawn lo a; nimahsela tuna kan kalpui dan induhsakna uchuak leh thianghlim lo lutuk hi chu tihtawp ni se, ram enkawlna kawngah kan politician-te hi
ṭhangharh nawn leh rawh se.