Anganwadi zirna

Social Welfare depart-ment chuan, Mizorama angan-wadi centre tina kalpui tur Early Childhood Care & Education (ECCE) curriculum an hawng a, Mizorama anganwadi centre zawng zawngah hman ṭan a ni.

Anganwadi pawimawhna Mizoramin kan hre fuh hi a lawmawm a, hemi kawngah hian hnathawktute pawh an fakawm hle. Zirna hi a bul ṭhuta a fuh tawh loh chuan a kal dik mawh hle mai a, naupangin zirna bul a ṭanna hmun aṭanga mumal taka thil kalpui a nih chuan a ṭhan len hunah pawh a pui hle ang.

Hei vang hian anganwadi hi uluk leh mumal taka kalpui tur a ni a, he mi kawngah hian Mizoram hi a tiṭha pawl tak pawh kan ni hial ang. Tunah chuan khawpuiah pre-school hawnte an intihhmuh tawh a, hengte pawh hi a ṭangkai em em a; amaherawhchu pre school-a kal thei naupang hi chu Mizoram pum thlirin mi tlem te chauh an la ni.

Naupang hi chhungkaw inang lo tak tak aṭanga lo kal an ni a, ṭhenkhat hi chu in lama zirtirna ṭha pawh dawng lo leh ṭanpuina mamawh tak takte an ni. Heng naupangte hi an tetlai aṭanga lo ṭanpui a, kawng dik kawhhmuh a, zirna ṭha tak pe turin anganwadi-a hnathawktute an pawimawh khawp mai.

Mizoram hi siam ṭha leh tur chuan chhungkua aṭanga inzirtirna ṭha nen bul ṭan a ngai, tih sawi ṭhin a ni a, chutiang tluk zeta pawimawh chu anganwadi zirna hi a ni. Anganwadi kalphung mumal zawka kaltir tum a ni a, hei hi hlawhtling taka kalpui theih ni se, ram siamṭhat bul ṭanna a ni thei tih hriain anganwadi zirna hi ṭha takin i kalpui zel ang u.