DA tihpun leh a kaihhnawih
November 17, 2025-a Council of Ministers ṭhukhawm chuan Mizoram sorkar hnathawkte dearness allowance tihpun a remti. Hei vang hian Federation of Mizoram Government Employees and Workers (FMGEW) chuan sorkar chungah an lawm thu an tarlang.
Council of Ministers rèl dan chuan, sorkar hnathawkte DA hi November 1, 2025 aṭangin 4%-a tihpun tur a ni a, April 1, 2026 aṭangin 2%-a tihpun leh tur a ni. Hengte hi a taka kalpui ve ve a nih chuan Mizoram sorkar hnathawkte DA chu 44% a ni dawna sawi a ni a; Sorkar laipui thawkte chuan DA 58% an la meka sawi a ni. DA tihpun vang hian sorkarin sum tam tak a sên belh ngei dawn.
Hun kal tawhah FMGEW hian DA tihpun phûtin lungawi lohna an lo lantir tawh ṭhin. Sorkar hnathawk zawng zawng telna pawl a nih avangin an hùháng a ná a, lungawi lohna an lantir tawh hi chuan sorkar pawhin a tihpuitlinsak leh nge nge ṭhin.
Lungawi lohna lantir avanga thil intihsak hi a ṭha ber lo thei a, nawrh khum ngai loa sorkarin DA a tipung hi a lawmawm. Thil tih theih leh tih hun tawh hi chu nawrh kher ngai loa tih mai a ṭha. Lungawi lohna lantir leh sorkar hna kal laiin a tawrh tawh hnua tihsak leh tho ai chuan, hna kal tluang pangngaiin a tawrh hmaa tih mai a ṭha a; tih theih loh erawh chu 'theih loh' ni zel mai se.
Mizoram sorkara thawkte hi sorkar laipuia thawkte nen inkhaikhin theih a nih rualin, thil tinrêngah inkhaikhin theih a ni lo a, hamṭhatna an chan leh neih ang zawng zawng neih ve vek theih a ni lo. DA pawh sorkar laipuia thawkte lak ang zat zel beisei chi a ni lo.
Sorkar hnathawkte hi sorkar dinhmun hre chiangtu an ni a, Mizoram sorkarin sum a neih dan te, a retheihzia te, a tih theih chin turte pawh hre chiang bertu an ni. Hun kal zelah pawh sorkar dinhmun ngaihtuah chungin sorkarah duh leh beisei neih ṭhin ni se, sorkar bakah, ram leh mipuiin an tawrh phahna thlen tur khawp chuan phût nei lo ṭhin se a duhawm.
Mizoram sorkar leh a hnathawkte hian sorkar sum hi sorkar hnathawkte tana hman a tamzia leh mipui tam berte tana hman tur a tlemzia pawh ngaihtuah thlen a ngai a; chumi hre reng chuan thutlukna an siam zel a ngai e.