Bul ṭan thar duhna rilru put

Planning Minister Lalsawta chuan, tun hnaia Gujarat an tlawh report a pek pahin Mizoram sorkar chu kuthnathawktute enkawl danah bul ṭan thar turin a inpeih tih a sawi a, bul ṭan tlai hret tawh mah se tih loh ai chuan a ṭhat thu leh, bul ṭan tura remruatna an neih thu a sawi.

Tun hnaia Mizo-ram sorkarin high level team tira Guja-rat-a an thlai chin dante leh an sawngbawl san zir chiang tura an kal hi thil ṭha tak a ni a, rah ṭha a chhuah ngei a beiseiawm. Hmasawn tur chuan kan kal-phung pangngai thlak ngam a ngai a, chutiang tur chuan ruahmanna neih ṭhat a ṭul thung.

Sorkarin tlangram lo neih tihtlem tawlh tawlh a, kuthna-thawktute’n lei rem an rah ve theih dan tur policy a duang a, a hmingah pawh New Land Use Policy (NLUP) tih a ni. A duan chhuahna rilru chu ṭha hle mah se, a kalpui dan turah hian an indap chawp deuh tih chu phat rual a ni lo a, tlangram lo neih kan tih pawh hi a tlem phah tak tak lo niin a lang.

Engpawhnise tuna kan kal dan hi chu kan pi leh pute’n ziak leh chhiar an thiam hmaa an lo neih ang tho kha a la ni deuh vek a, a hlawm lian thama ṭhatpui tura thil ching hi kan la tlem hle. Hei hi kuthnathawktu lam bengvar loh leh fin tawk loh vang ni bawk mah se, sorkar lamin an finchhuah loh vang leh kawng an kawhhmuh ṭhat loh vang a ni zawk mah ang.

Tunah chuan khawvel ram dangte pawh ni lo India rama state dangte’n min tlansan thui tawh a, sorkar pawh a harh ve ṭan ta. Hlawk zawk leh awmze neia thil kalpui a hun tawh tih an hria a, inthlak danglama bul ṭan thar duhna an nei niin a lang a, a lawmawm hle. Hei hi a takin bawhzui se, bul ṭan thar tura remruatna an neihte pawh a takin han lantir thei se a ṭha khawp mai.