Kawngpui 'ṭha' siam hun

Aizawl khawpui chhung kawngpui chu October 31, 2025 zan aṭangin siam ṭan a ni a, tunah hian siam mek zel a ni. PWD Minister chuan November 12, 2025 zana kawng siam mek a tlawhnaah, kumin Krismas hmain Aizawla kawngpui a tam thei ang ber siam tum a nih thu leh nakkum fûr hmain Mizorama kawng pawimawh chin siam hman vek tum a nih thu a sawi.

Mizoram sorkarin kumin ruahtui hul veleha Aizawl khawpui chhung kawng a siam nghal hi a lawmawm a, tuna an siam tawh chinah chuan a ṭha thawkhat ni pawhin a hriat a, a lawmawm. Kawngpui ṭha leh tlo, mipui beisei pha zânin siam zel se. Kawngpui a tlo theih nan kawng 'leveling' dik a pawimawh a, 'side drain' ṭha a pawimawh tel bawk.

Ṭhál hmasaah khan Aizawl khawpui chhunga hmar lamah kawngpui siam a lo ni tawh a, mahse, a ṭha tâwk lo a, hmun ṭhenkhatah phei chuan thawm ṭhat hma aia chhe ta zawk mah te pawh a awm. A chhan puh tur hrang hrang a awm thei a, a siam ṭhat tawk loh chu chhan lian ber niin leveling dik lo leh side drain ṭha lo chu chhan lian tak a ni thei ang.

Tun ṭhál laia kawng siam erawh chu a hmaa mi ang mai mai a nih loh nan ṭan lak a ngai. Kawng hi sorkar ṭha leh ṭha lo tehna a nih avangin an ngaih pawimawh a ṭul hle. A bik takin ei leh bar lakna kawng ber 'National Highway' hi ngaih pawimawh a ngai a, nakkum furah chuan kawng chhia avanga lirthei neitute an nawrh tawh loh nan sorkar hian kawng ṭha tak an siam a ṭul takzet. Mipui pawhin an tuar a, nawrh huaihawt ve kher lo mah se kawng a ṭhat theih loh chuan inthlan leh hunah an hre kar ang.

Aizawl khawpui chhung kawng siam mek hi a siamtu company-te'n a nih tur ang taka a siam ngei a ngai a, chutiang tur chuan sorkar lama thuneitute pawhin ṭha taka an vil zel a ngai ang. Sorkar (ministry) lama hotute pawh ṭha taka an enpui zel a pawimawh bawk.

Kawngpui siam hi ṭha tak, tlo tak tura siam ngei ni se, sawisel kai lo turin siam ngei ni rawh se. Ṭha tawk lo lai leh sawisel tur àwm chi a awm a nih pawhin mipui, pawl leh political party ten sawisel hreh lo se la; sorkar leh kawng siamtute vil tlang ila, kawng tha leh tlo kan neih ngei theih nan kan tih theih tawk ṭheuhah hma kan lak tlan a ngai a ni.

Kan kawngpuite a zau tâwk lo a, siam a nih mek laiin lirthei a tlan lo thei bawk si lo. Kawng siam a nih chhungin lirthei tlante tana han nghah deuh a tul hun pawh a awm thei a, chung hunah chuan mipui pawhin hriatthiamna nen dawhthei taka kan nghah thin a ngai a ni.

Aizawl a ni emaw, state chhung hmun dang emaw pawh ni se, kan kawngpuite hi kan ven tlang a, tha tak, tlan nuam tak ni vek ni vek se kan duh a; chutiang a nih theih nan chuan i tang tlang zel ang u.