College zirtirtu

Lawngtlai College-a assistant professor pahnih sawn chhuak a, an aiawh dah nghal a nih si loh avangin Lai Student Association (LSA) chuan lungawilohna lantirin tun hnaiah Lawngtlai College leh DC pisaa hnathawk kal turte an dang a; an aiawh tur dah a nih loh avangin zirlaite chuan Mizoram sorkar hnenah an sawn chhuahte aiawh dah tur leh mi dang dah an nih loh chuan transfer order sût turin an ngen a ni. 

Tun hnaiah Mi­zorama college zirtirtu siksawi dan leh zirtirtu lak tharte posting-ah sawi neuh neuh a tam hle. Hei hi Assembly House-ah sawifiahin Higher and Technical Education minister chuan a thiam apiang Aizawla dah tur an nih loh thute a sawi a. Aizawl pawnah zirtirtu ṭha mamawhna a san thute a sawi a, a sawi dik hle. 

Zirna in hi a zavaiin a pawi­mawh vek a, a hniam lam pawi­mawh zawk dan sawi theih a ni a, a sang lam a pawimawh zawk dan pawh a sawi theih ang. Chutihlaiin kan zirna in sang lam kan enkawl dan hi chu uluk zawk leh fimkhur zawka kalpui a hun tawh. RUSA hnuaia zirtirtu lak tharte kan dah danah pawh khan kalphung a awm lo a, tute emaw duh danin a kal mai mai a ang khawp mai. 

Primary School aṭanga Higher Se­condary School-te thleng hian a ṭha­t­hnem tham avangin transfer leh posting hi felfai taka kalpui a harsa a nih pawhin, sorkar college bik hi chu kut zungṭang thliaka chhiar tham vel lek a la ni a, hei tal hi chu kan sorkar hian awmze neiin enkawl se, sorkar college zirtirtu transfer leh posting hian kalphung mumal deuh a neih a hun tawh takzet a ni.