Khawpui danga Mizote himna

Mizoram sorkara thalaite kaihhnawih department pahnih – LESDE leh Sports & Youth Services enkawltu Minister chuan November 19, 2025 khan Goa state Chief Minister a kàwm a, Goa-a awm Mizote'n harsatna an tawh palha an tluk luh theihna tur leh ṭanpuina an dilna tur ruahman turin a ngen.

Minister sawi danin, Goa-ah hian Mizo 1,500 vel an awm a, hmarchhak state mi phei chu sing khat chuang an awm. Mizo leh hmarchhak mi, Goa-a awm zinga a tam ber chu hna thawka awm an ni.

Goa-a hi India ramah chuan khualzinin an tlawh nasat state, hnam hrang hrang, ram hrang hranga mite tamna a ni a, an state chhunga cheng zinga 30%–35% vel lai chu Goa mi leh sa dik tak ni lo, hna thawka awm leh zin khawthawng (floating population) an nia sawi a ni. Khualzin an tam avangin nawmchenna lam tih nasatna hmun a ni bawk.

Zêp thu chêng lo, Goa-a Mizo awmte zinga tam tak chu hotel, resort, spa leh casino vela thawk an ni a; hnam dang, India mi leh ram dang mi, mi chi hrang hrang chet tlat tamna a ni. Hnam chi hrang inpawlhsawp lutuk karah hian sualna leh pawikhawihna pawh a tam ṭhin a, chuvangin, fimkhur a ngai em em.

Mizo ṭhalai, Goa-a hna thawka awm leh thil dang vanga awmte himna tur ngaih pawimawh a ṭul a, chutiang zawnga LESDE Minister-in hma a la hi a lawmawm hle. Goa Chief Minister pawhin a lo ngai pawimawh a, Goa-a Mizo hna thawka awmte'n harsatna an tawha an harsatna an thlenna tur siam a nih theih nan hma a la nghala sawi a ni a, a lawmawm tak zet. Goa-a Mizote tan a thlamuanthlak hlein a rinawm.

India ram khawpui Delhi-ah hmarchhak mi tam tak an awm a, harsatna an tawk zauh zauh tawh bawk a; hmarchhak mite himna tura hma la tur bik pawh sorkarin a din hial tawh. NE mite tan a ṭangkai hlein a rinawm. Hmarchhak mite buaipuitu tur bik sorkarin a din ang hi khawpui dangah erawh chuan a la awm meuh lo niin a lang a, state sorkar hotute nen mumal taka hmalakhona pawh a la awm lo a ni mai thei.

Himna hi mihring nuna pawimawh ber zinga mi a ni. India ram khawpui lianah Mizote kan awm tam tial tial a, nunphung, zia leh thil dang dangah danglamna bik tak nei kan nih avangin himna a pawimawh hle. LESDE Minister-in Goa CM a dawr ang hian Mizo awm tamna khawpui/state danga CM leh sorkar hotute pawh dàwr a, Mizote himna tur ngaihtuahsak tura hmalak zel ni thei se a ṭha hle ang.