Kuhva tawlhruk titawp turin ṭang zel ila

Hachhek biala kuhva chíngtute chuan kuminah kuhva rah an tharte an hralh tha thawkhat viau a, cheng nuai 5,000 chuan man an hralh tawh.

Kuhva chíngtute'n harsatna lian tham awm lo leh man man taka kuhva an tharte an hralh thei hi a lawmawm tak zet. Kut hnathawktute'n an thawh rim rah an tèl a, an thawh rim ang taka hlâwkna an hmuh hian hlimna a thlen a; kut hna thawk ve miah lote pawhin an lawmpui ṭhin a ni.

Mizorama kuhva tharte man mak tak leh tluang taka an hralh leh thei tâk chhan ber chu–Myanmar lam aṭanga ran dang kuhva tawlhrûk a tlem tâk vang nia sawi a ni. Myanmar lam aṭanga kuhva tawlhruk a nasat lai chuan, a man a lo tláwm zawk bawk si nen, kuhva lei ṭhinte'n Mizorama thar kuhvate an lei ṭha duh lo a, chu chu kuhva chingtute'n an tuar em em ṭhin.

Ram dang kuhva tawlhrûk hian nghawng ṭha tam tak a nei. Mizorama kuhva chíngtute'n an thawhrim rah an tél thei lo a, an khawngaihthlak em em. An thinlungah beidawnna siam a, pawisak neih lohna a thlen bawk. Kuhva man leh a phurhna lirthei hâl hial a thlen phah a; buaina lian zawk leh tharum thawhna lian tham a thlen phah hial a hlauhthawnawm ru hman a ni.

Kuhva tawlhrûkin sum hlutna a titlahniam a, thil ṭhenkhat man a tisang a, a bik takin inhmun man a san phah hlea sawi a ni. Thawhrimna aiin dan loa thil tih a hlâwk zawk anga ngaihna a siam a, chu chuan mi tam tak rilru a piansualtir a ni. Hengte hi a pawi hle.

Hun kal tawhah kuhva tawlhrûkah sorkarin mit a siai a, dan loin chhiah a la hial. Kuhva rah tawlhrûk hian nghawng ṭha lo tak tak a nei a ni tih hriaa a tàwp theihna tura sorkarin hma a lak ta hi a lawmawm a, sorkar hmalaknain rah ṭha a chhuah mek. Kuhva chíngtute'n an thawhrim rah an tèl theihna tura ṭhahnem an ngaihna a chhuanawm bawk.

Tunah hian kuhva tawlhrûk a la tawp hmak lo. Hei hi Hachhek biala kuhva chíngtute hriat dan a nih bakah, Home Minister pawhin a pha lo. Titâwp hmak tur chuan hun a duh ve deuhin a lang a, thâ thlah loa na zawka hmalak zel a ngai a ni.

Ram dang kuhva dan loa tawlhruk ṭhat lohzia te, Mizoramin kan tawrh dante kan hre tlang a, kuhva tawlhrûk tlêm tâin thil ṭha a thlente pawh kan hre tlang. Kuhva tawlhrûk a tàwp tak tak theih nan sorkarin theihtawp chhuah zel se, mipui leh pawlte'n sorkar hmalakna theihtawpa kan thlàwp a ṭul.