Khua/veng chhunga hmalak

Central YMA leh Aizawl City Local Council Association hruaitute chu November 17, 2025 khan CYMA Office-ah an inkâwm a; ILP chungchang, dan loa hnam dang sumdawng, Aizawla kawng siam mek en zui leh ruihhlo do chungchanga hmalakho dan turte an sawiho.

Inkawmhonaah hian CYMA President chuan YMA-in ruihhlo do kum a puan chu chak taka bawhzui an tum thu leh, an hmalaknaah local council-te ṭawiawmna an mamawh dawn thu a sawi. ACLCA President pawhin, YMA-in ruihhlo a dona chu an dodal loh thu leh a theih ang anga an thawhpui dawn thu a sawi bawk nia tarlan a ni.

Ruihhlo a hluar hle tih hi chu inhrilh nawn a ngai tawh lo a, kan hriat tlan a ni. Mipui nawlpui pawh kan ngaihven tawh a, kan vei tlang. ILP nei loa Mizorama hnam dang awmte leh dan loa hnam dang sumdawngte pawh kan ramah awm lo se kan duh vek àwm e.

A chunga mite hi kan ram leh hnam tichhe thei thil a ni hlawm a, tihtawp theih ni se, kan ramah awm lo se kan duh vek ang. Mahse, vei ringawt a tâwk lo a, vei viau ringawt avangin a tlem mai thei lo a, a tàwp phah lo a; a tak taka chet chhuaha ṭangruala hmalak ngai vek a ni.

Ruihhlo, ILP, dan loa hnam dang sumdawnnate hi awmze nei lehzuala do tur chuan a bulthûm aṭanga hmalak a ṭul. Dan loa thil titute hi awmna khua/veng nei vek an ni a, khawtlang hruaitute'n mahni khua/veng ṭheuhah theihtawp chhuahin hma la se awmzia a nei hlein a rinawm.

Khawtlang roreltu VC leh LC te bakah, YMA-te hi mahni khua/veng chhung ṭheuh hre chiang bertu an ni a; ram leh hnam tana thil ṭha lo leh hlauhawm thei chi hrang hrangte a bulthûm aṭanga do tur pawhin anni aia ṭha an awm bik kher lo ang.

Chuvangin, ruihhlo donaah leh, ILP nei lo leh dan loa hnam dang sumdawngte titawp turin veng tinah YMA leh LC ten thawhhona mumal tak nei thei se, committee bik din ni thei se; chutiang bawkin thingtlang lamah pawh YMA leh VC-te ṭangho se. A ṭul ang zelin an khua/veng chhung ṭheuhah ruihhlo ngaite en zui se, hnam dang awmte endik ṭhin se awmzia a nei hle ang.

Chutih rualin, inven a ngaihna lai a awm nual bawk a; chu'ngah chuan fimkhur ni se. Sorkara mawhphurtu leh thuneitute nen thawhho ṭhat a pawimawh a, dan hnuaiah zel hmalak ni thei se.