Mizoramah HIV/AIDS

MSACS chhinchhiah danin Mizoramah thisen endik tawh 5,54,644 an awm a, heng zinga mi 13,044 chu HIV positive an ni tih hmuh chhuah a ni tawh.

December 1 kha World AIDS Day a ni a, khawvel pumah he ni hi hman a ni a, Mizoramah pawh kum dang ang bawka hman a ni. He ni hi dan pangngaia hman ni mah se, Mizoramah a nghawng dan hi chu kum dang aiin a dang ta emaw tih tur a ni. A chhan chu HIV positive hmuh chhuah zat an pun chak vang hi a ni.

Mithiamte chuan thisen test tawh zat hi mihring zat an ni lo an ti a, 5,54,644 zingah hian mihring pakhat thisen test nawn a awm theih avangin hei ai hian a mihring zawng chuan an tlem zawk an ring. Chuta ṭanga HIV positive hmuh chhuah zat erawh a sang hle a, tun ang zela HIV hi a darh chak a nih chuan Mizoram hmabak hi a thim takzet a ni.

HIV darh zel tur venna hmanraw pawimawh tak chu inchiuna hriau thianghlim thehdarh leh inpawlna thianghlim zawk hman a nih theihna tura condom thehdarh a ni. Hei hi Mizo rilru aṭanga teh dawn chuan a dik thei tlat lo. Drugs-a inchiuna tur hriau pek leh inpawlnaa an hman tur condom pek hi Mizo leh sakhuana zawn
aṭanga thlir pawhin thil âwm lo tak a ni.

Hetihlai hian kan ram dinhmun dik tak hi kan pawm ve mai a ngai a, inchiu lo thei lo hi mi tam tak an awm tawh a, inthlahdah taka mipat hmeichhiatna hmang reng hnam kan ni bawk. Heng-te avang hian HIV a darh chak si a, a venna kawng pawimawh chu an hman tura hriau thianghlim leh condom pek hi a ni.

A ṭha ber inzirtir chungin kan tlin tawk hi kan pawm ngam a
ṭha a, inchiu loh leh nupui pasal neih hmaa inpawl loh hi a ṭha ber a; nimahsela a tlin lo kan tam si avangin hruai thianghlim leh condom sem hi Mizorama HIV/AIDS a darh zel tur venna kawng pawimawh a ni e.