Sorkar leh private hospital inrem a lawmawm

Mizorama mimal leh kohhran damdawi-inte inzawmkhawm pawl, Non-Governmental Hos­pital Association of Mizoram (NGHAM) chuan, hun rei tak chhung an zawm duh loh hnuah Health minis­ter ngenna angin Mi­zo­ram State Health Care Scheme (MSHCS) zawm turin thutlukna an siam fel ta. 

NGHAM leh sorkar a inrem theih loh chhunga tuartu ber chu mipui an ni a, tuna remna a awm thei ta hi a lawmawm hle a ni. Sorkar leh NGHAM a inrem theih loh chhung khan sorkar lamin thuchhuah rum tak tak an nei a, hemi rul tawk tur hian NGHAM lamin thuchhuah an nei ve bawk a, sorkar ruahmanna siam tam tak an zawm theih loh chhante an tarlang ve bawk. 

Sorkar lamin NGHAM an nawrna tur leh, an thuchhuahah an ding tih tichiang turin health care scheme duan thar zawm duh lotute chu empanelment an hlihsak a. Hemi chhunga a tuartu chu a damdawiin neitu lam ni bawk mah se mipui lamin an tuar ber a tih loh theih loh.  An inremna thute mipuiin hre kilhkelh lo mah ila, Health minister ngenna chhanga NGHAM lamin MSHCS an zawm thei ta hi a lawmawm a, mipui damlo harsatna thui tak a su kiang ngei ang.