Krismas hmanga khualzin hîp

Tourism Minister chuan November 15, 2025-a Leitlangpui Music Festival khârna a hmanpuinaah, kumin December 15-23 chhungin Aizawlah Winter Festival buatsaih leh tum nih thu te, Krismas lam hawia hun duan a ni a, Christmas carol leh costume parade-te buatsaih tum a nih thute a sawi.

Kumin kum tawp lama Tourism department huaihawta hun hman tur duan, Minister-in a sawite hi khualzin hîpna atana tih a ni hlawm. Eng ang taka hlawhtling tur nge tih hriat lâwk theih a ni lo a, khualzin hîptu ni tak tak tur chuan hun a duh deuhin a rinawm.

Khualzin (tourist) kan tih hian mi tam tak chuan state páwn lam mi kan mitthla mai thei a, tualchhung mi chu mahni state chhungah chuan tourist anga ngai lo pawh tam tak an awm mai thei. Mahse, Mizoram mi hi kan state chhungah vêk tourist kan ni thei a, hmun dang, khaw danga hmun nuam leh pawimawh te tlawha kan zin kual hian tourist kan ni.

Tourism-in a tum pakhat chu, khualzinte hmanga ram (state) chhunga mite'n sum leh pai an lak luh a, eizawnna leh hlâwkna an neih a, chumi atanga sum leh pai dinhmun tihsan a ni. Chutiang tur chuan khualzin hîpna tur ṭha ngaihtuah reng a ngai a, kan neih sa leh tih sate tihchangtlun zel a ngaih bakah, thil thar, mipui hîp tur ngaihtuah chhuah thiam a pawimawh.

Minister-in a sawi, Krismas dawn hnaiha christmas carol leh costume parade buatsaih hi thil ṭha tak a nih a rinawm a, Krismas vuakvetah Krismas nihna leh a behbâwm thilte lantirna ṭha leh remchang tak a ni ang.

Aizawla No Vehicle Zone hman ṭan tirh lam khan Salvation Army -te'n rimawi chi hrang hrang tum chungin kawng an zawh a, boruak a siam hle. Khatiangte kha chhunzawm leh theih ni se, hnam dang leh ram dang mi tana Krismas boruak siamtu ber, hmuhnawm leh hlimawm ber a ni thei hial ang.

Kum tin Christmas parade neih ṭhin ni se, khawvela christmas parade ropui ber Mizoramah kan siam thei hial ang. Kum tina tih a nih chuan a lâr zel ang a, Mizoram tilârtu, state pawn lam khualzin hîptu ṭha tak a ni thei ngei ang.

Mizorama kan hunpui ber chu Ktismas a ni, khawvelah Krismas hmang uar ber zinga mi kan ni hial ang. Heti taka kan ngaihhlut leh kan hman uar, kan hunpui ber Krismas hi khualzin hîpna ṭha takah kan chantir a ngai; chutiang zawng chuan sorkar leh mipuite'n rilru kan put chhoh a ngai a ni.