Lirthei leh kawngpuia fimkhur

Lirthei khalhtu pawlte inzawm khawmna, Zoram Drivers' Union chuan November 25, 2025 aṭang khan kumina lirtheia fimkhurna hapta, 44th Road Safety Week an hmang ṭan a, Transport Minister-in a hawng. Road Safety Week hi December 1, 2025 thleng hman tur a ni.

Lirtheia himna a pawimawh em em a, him zawka lirthei khalh a nih theihna tura inzirtirna leh himna pawimawhzia mi tinin an hriat thar leh theihna tura Road Safety Week hman ṭhin a ni hi a lawmawm. A hlâwkna tehna awm lo mah se, mi tam takin lirthei leh kawngpuia himna pawimawhzia an hriat thar lehna remchang a nih avangin Week hman hi a ṭha.

India ramah kawngpuia lirthei chetsualna a thlen tamzia sawi a ni ṭhin a, khawvel ram dangah pawh a tam thoin a rinawm. Mizoramah pawh a tam thawkhat a, kuminah pawh mi eng emaw zatin an thih phah tawh a, hliam na tak tuara ramtuileiloa awm phah pawh an awm nual bawka sawi a ni.

ZDU Road Safety Week hi lirthei khalhtute'n an fimkhur a ṭulzia an hriat tharna hun ni a, lirthei khalh fimkhur a ṭulzia hre ringawt loin, a tak taka an fimkhur phahna ni ngei se a duhawm. Chutiang a nih phawt chuan Road Safety Week hlawhtling tak a ni tihna a ni ang.

Krismas vuakvêtah hian Mizo mipui rilru a phâwklêk ṭhin a, December thla a nih tawh chuan rilru a heheu deuh tawh ṭhin. Hetiang hi kan nih vang a ni mai thei, Krismas dawn hnaiah lirtheia chetsualna a thleng duh bika sawi a ni ṭhin. Lirthei khalhtute fimkhur a ṭul lai ber hun kan thleng chho ṭan mek tihna a ni.

Road Safety Week han tih hian lirthei khalhtute kan kâwk ru deuh a ni mai thei a; mahse, lirthei khalhtute chauh ni loin, kawngpuia kea kalte leh kawngpui sira che vel ṭhinte pawh a huam vek a, kan zavaia kan fimkhur tlân a ngai.

Lirthei khalhtute'n anmahni leh an lirthei khalha chuangte nunna kawltu an ni tih an inhriat reng a pawimawh. An fimkhur lohna avangin anmahni leh mi dangte thihna a thleng thei a ni tih hre reng a, eng lai pawha an fimkhur a ngai; rûi chung phei chuan lirthei khalh lo se a ṭha ber. Mipui pawhin rûi chunga lirthei khalhte lirtheiah chuan loh ngam a ṭul bawk.