Private school-te harsatna

Aizawla private school neitute chuan Covid-19 avanga hun rei tak chhung zirlaite aṭanga tuition fee 50% chiah an lak thu leh, sikul building luah man leh zirtirtu hlawh an pek reng a ngaih bawk avangin harsatna an tawk tih an sawi a. Sikul neitu ṭhenkhat chuan sikul hawn leh thuaia dan pangngaia kalpui an duh tawh thu an sawi. 

Covid-19 nghawng hi a na a, eizawnna tam takin a tuar mek a, chu'ng zinga pkhat chu private shcool-te hi an ni. An sawi ang hian zirlai fee aṭanga sikul building luah man leh zirtirtute hlawh pe ṭhin an nih chuan an tuar ve dawn hle tih a lang a, sikul ṭhenkhat chuan zirtirtute hi an hlawh 50% chiah an pe tawh a ni. 

Mizorama private school-te harsatna tawh hi sawi nep sak chi a ni hauh lo a, chutih rual chuan anni aia hri leng chhiatpui zawk eizawnna tam tak a awm tih erawh hriat tlan a ṭha hle. Mi tam tak chuan an eizawnna an chân hial tawh a, eizawnna ṭhenkhat chu 50% pawisa lut chu sawi loh chân belhin an awm mek a, hri len hnua a hloh zawng hlira kal tawh pawh an awm hial a ni. 

Khawvelin a la tawn zen zen loh harsatna a ni a, hei hian hun rei tak chhung chu min nghawng dawn a, chutah chuan a vanduai pawl an awm lo thei lo. Hetiang hunah hian min khai chhuak theitu sorkar hausa leh chak kan nei lo a, hun harsaa belhtlak sorkar kan le neih miau loh avangin hripui avanga vanduaina hi private-a eizawnna kalpuitute leh an hnuaia inhlawhte hian an la tuar dawn chauh a nih hmel. 

Private school-te'n an harsatna tawh an sawi chhuak a, private-a eizawnna hmun dangah pawh hetiang tluka harsatna tawk leh a aia nasa zawka Covid-19 vanduaipui hi an awm. Engpawhnise he hun harsa kan tawhah hian sorkar pawhin thutlukna hrang hrang a siam dawnin thla bia a ngai ang renga hlawh la ṭhin sorkar hnathawk kal khawm mai ni lo hi rawn zau se. Tlawmngai pawl leh kohhran hruaitute ringawt rawn lo hian, eizawnna hrang hranga mite ngaihdan la khawm thiam se a finthlak hle ang.