Pisa kai hun vawn dik a ṭul

General Administration Department (GAD) chuan November 26, 2025 khan office memorandum a tichhuak a, Mizoram Secretariat-a thawkte chu pisa kai hun ngai pawimawh turin a hriattir.

Mizorama sorkar hnathawk zinga tam tak chu tun hma aṭangin pisa kai hun zâwm ṭha lo, pisa kai huna thleng hman ngai lo leh bàn hun hmaa báng ṭhin an ni a; phat tur a awm lo. Sorkarin pisa kai hun ṭha tak zâwm turin hriattirna chhuah ṭhin mah se, sorkar hnathawk tam tak chuan an ngai pawimawh chuang lo a, sorkar pawhin tihngaihna tak a hre bik lo a ni mai thei.

Sorkar thar a pian hnuah pisa kai hun chungchangah sorkar a khauh zual deuh niin a lang a, sorkar hnathawkte'n pisa kai hun dik tana an vawn theih nan biometric attendance leh KAI application te hman a ni. Sorkar a khauh tâk deuh avangin sorkar hnathawkte pawhin pisa kai hun an vawng dik tlang thawkhat ta niin a lang.

Pisa kai hun sorkar hnathawkte'n an zâwm ṭha viaua hriat a nih laiin, GAD-in pisa kai hun ngai pawimawh tura hriattirna tun hnai têa a chhuah leh ta hian ngaihtuah a tithui a; sorkar hnathawk zingah pisa kai hun zâwm lo an awm leh ta nual a nih a rinawm.

GAD office memorandum-a a lan danin, MINECO-a pisa kai ṭhin zingah biometric attendance-a inthun lo an awm ṭhin niin a lang a; a zia lo hle. Biometric attendance-a thun lohte chu pisa kai lo anga chhinchhiah an nih ṭhin avangin sorkar hnathawkte'n an ngaih pawimawh ngei a ngai a ni.

Office memorandum thar hian MINECO-a thawkte kâwk bik mah se, sorkar pisa dang zawng zawng tan pawh a pawimawh. Pisa ṭan huna thlen hman leh bàn huna bàn hi sorkar hnathawkte tih ngei tur, mi taima leh rinawm zia a ni. Hei hi sorkar hnathawkte'n an hre reng rawh se.

Chutih rualin, loh theih loh thila tlai hret leh a hun hmaa pisa aṭanga chhuah a ṭul chángte awm thei a ni a, chutiang a awm a nih chuan thuneitute hriatpui ngeia tih tur a ni.

GAD office memorandum-ah vêk hian, sawi lâwk loin attendance endik ṭhin a nih ṭhin dawn thu a lang bawk a; hei hi a ṭha a, sawiah tàwp mai loin, a taka bawhzuia endik ngei ṭhin ni rawh se.