MzSU campus dinah insûm rih ila

Champhaiah Mizoram State University Eastern Campus din tura ngenna Champhai District NGO Coordination Committee chuan November 26, 2025 khan Chief Minister hnenah an thlen. Mamitah MzSU Western Campus dah tura ngenna Mamit District Ṭhalai Pawlin November 28, 2025 khan Higher & Technical Education Minister hnenah an thlen bawk.

Champhai District NGOCC leh Mamit DṬP te hian an district headquarters ve ve-ah MzSU campus din a âwm viauah an ngai ve ve tihna a ni a; din àwma an ngaih chhan leh an duh chhante pawh an dilna lehkhaah an ziak ve ve a ni.

Chutih rualin, thil tih àwm a ni em, tih theih a ni em, Mizoram mipui hian awm an tihpui em, tihte erawh ngaihtuah tham a ni. University campus diltu district ni lo, hmun dang zawnga mite chuan àwm an tihpui kher lo mai thei; ram/state pumpui hmakhua ni lo, mahni khaw bil hmakhua ngaih vangah an ngaihsak a nih pawhin a àwm viau ang.

NEP 2020 angin, state tinin kum 2035-ah state university an nei tawh tur a ni a, Mizoramin state university a la neih loh avangin din tumin hmalakna a kal ṭan chauh a ni. MzSU din tum hi tun hnai maia puitling tur a ni lo tih hriat a ṭha.

State university pawh din a nih hma hmaa dinna hmun tur ni lo, hmun (khaw) dang daiha campus din lo sawi nghal ringawt hi chu a la hun lo deuhah a ngaih theih. MzSU dinna tur khawpui dan anga tihfel a la ni lo a, a thuin Lungleiah din tura tih a ni mai chauh a ni.

Lungleiah din tur pawh ni se, khawiah nge a awm ang, engtiang taka din tur nge tihte leh thil dang chi hrang hrang tihfel tam tak a la awm lo. Chutiang taka thil la chiang lo leh la fel lo a nih laia khawpui dang daiha campus din chungchang tuna lo buaipui nghal hi chu a la hun lo.

State university din tumin sorkar hotute'n ngaihtuahna tam tak sêngin an buaipui a, sorkar official-te'n ram tana ṭha ber tur thlir chungin theihtawp an chhuah bawk. Chutih laia campus din lo buaipui a, hotute lo nawr nghal ngawt hi chu thuneitute rilru tibuaitu mai a ni ang a, state university din tura hmalakna timuangtu zawk a nih ang tih a hlauhawm. Chuvangin, a hun thlir thiam a, insûm rih a ṭha zawk ang.