Mipuiin LADC sorkar nghet an beisei

Lai Autonomous District Council inthlanpui vawi 12-na chu vawiin hian neih a ni dawn ta. Zing dar 7 aṭanga tlai dar 4 thleng vote thlak hun hawn a ni dawn a, harsatna leh buaina awm loa tluang taka vote thlak theih beisei ila.

Tun ṭum LADC inthlanah hian MDC bial 25-ah candidate 80 an awm a; ZPM-in bial tin chuhin candidate 25 an nei a, MNF-in candidate 20, Congress-in candidate 14 leh BJP-in candidate 10 neiin, independent candidate mi 11 an awm bawk.

LADC term 11-na, kum 2020-a inthlan zawh a nih a, sorkar din a nih hnuah term khat chhungin Chief Executive Member (CEM) vawi nga lai lak luh hman a ni a, CEM lak luh a nih hnu lawkah sorkar a tlu leh mai ṭhin.

Hetianga LADC sorkar a tlûk fo chhan hi MDC ṭhenkhatte rinawm loh vang a ni a; an rinawm loh chhan hi LADC leh an bial aia mahni an inhmangaih vang leh sum leh pai ûm vang a nih a rinawm. Sorkar a ding chauh a, a tlu leh mai ṭhin kha chu LADC mai bakah, Mizoram ang pawhin a zahthlak thei hial a ni.

LADC term 12-na din turah erawh hi chuan tute pawh tling se, tu party pawhin sorkarna siam se, sorkar nghet tak din ngei tawh se a duhawm ngawt mai; hei hi LADC mipui leh Mizoram mipui duh dan a ni.

Sorkar siam tura party dang MDC-te sum leh therhlo dang hmanga inthlêm awm tawh lo se, chutiang tur chuan party tinin rilru pu rawh se. Inthlêm an lo la awm leh palh a nih pawhin, thlêmna tâwk MDC-te rinawm taka an awmna party-ah nghet taka an awm a pawimawh dawn.

LADC sorkar nghet tak a din theih nan MDC zawng zawng an rinawmna a ngai a, mahni ṭânghma hai loin, LADC leh an bial an ngai pawimawh tur a ni. MDC-a thlan tlin nih hnua an tlinna party phatsana party danga luh hi thlang tlingtu mipui zah lohna a ni a, MDC an nih theihna tura candidate nihtirtu party zah lohna a ni bawk.

Mizoram leh LADC mipuiin MDC rinawm an lo chhuah a, LADC sorkar nghet ṭha tak an din an beisei a ni tih hi MDC candidate zawng zawngin hre mawlh teh se.