Zirlaite theihna hai chhuah

Mizo High School chuan December 2, 2025 aṭang khan an sikulah an zirlaite kutchhuak chi hrang hrang pho chhuahna, Mizo High School Thûl an buatsaih a, tun kar chhung neih tura ruahman a ni. A hawnna inkhawmah Mizo H/S Literature Club member-te thu leh hla ziahna 'Thûlkhung' tih lehkhabu tlangzarh a ni bawk.

Mizo H/S Thûlah hian zirlaite kutchhuak chi hrang hrang pho chhuah a nih bakah, adventure-zip lining, food stall, indegenious entertainment, arts & craft, beauty & wellness, house of horror leh career guidance te buatsaih a ni.

Mizo High School-in an zirlaite theihna leh thiamthil tihhmasawnna tura hma la a, zirlaite kutchhuak hrang hrang pho chhuahna hun an buatsaih hi a lawmawm a, zirlaite phûrna petu, an theihna leh thiamna tipung zel tura tiṭangtu a nih ngei a rinawm. He sikul hian pipe pand leh cultural club ṭha tak an nei bawk a; zirlaibu piah lama zirlaite hmasawnna tur an ngai pawimawh tih a hriat a; a lawmawm hle.

Zirlaite hian an zirlaibua an zirte piah lamah tuina an nei tlangpui a, theihna leh thiamthil eng eng emaw an nei bawk ṭhin. Theihna leh thiamthil te hi tuai hriama tihpun zel a nih loh chuan a hniam ve tial tial thei a, a bo hial thei awm e. Chuvang chuan, intuai hriam zel a ṭul ṭhin.

Zirlaite leh ṭhalaite theihna leh thiamna tipung tur zawnga hmalak thiam a pawimawh em em. Zirlaite tuina leh theihna te, an thiamthilte hi zirtirtute'n an hmuh thiam a, hma an sawn zel theihna tura an phûrpui thiam a pawimawh a; nu leh pate'n an thlâwp ṭhat a ngai bawk.

Themthiamna hmanga zirlaite kut-chhuak pho chhuahna hun hi Mizo H/S hian kum dangah pawh chhunzawm zel se. Zirna-in dang ṭhenkhat pawhin an lo ti zauh zauh tawh a, a ṭha hle. La ti ve ngai lo zirna-inte pawhin an zirlaite hmakhua ngaiin tih ve nachang hria se a duhawm.

Chutih rualin, zirlaite kutchhuak pho chhuahna buatsaih tur hian zirna-in malin ringawt tan chuan sum leh pai leh thil dang dangah harsatna a awm thei a, sorkar leh department lam pawhin an puih a ngai ṭhin ang. Sorkar leh department hotute'n a ṭhatna leh hlâwkna an hmuh thiam a, an inhawn a, an puih ṭhin a ngai awm e.