Harsatna awm lo tura ruahmanna siam

December thla kan hmang mek a, Krismas boruakin min chiah hneh tial tial. Thlasik a inṭan a, December a thlen tawh hi chuan mipui rilrua phâwklêk ṭan a, huau huau rilruin mi tam tak thinlung a chiah a, eng emaw taka awm duhna leh tumna rilru a lian ṭhin. Mipui rilru phâwklêk avangin intihpalh leh chetsualna pawh a thleng duh nge nge ṭhin a, fimkhur hle a ngai.

December thla hi huau huau lam thil eng eng emaw buatsaih a tam thla a ni a, kan hma lawkah Lammualah thil chi hrang hrang huaihawt a ni dawn. Tun kar tawpah concert lian tham a awm dawn a, kar leh maiah Youth Festival buatsaih a ni ang a, Winter Festival-in a zui leh nghal dawn bawk. Heng bakah hian, khawpui chhung hmun hrang hrangah mipui punkhawmna eng eng emaw buatsaih a nih a rinawm.

Lammual hi Aizawl hmun lailí a ni a, thil tihna atana hmun remchang ber pakhat a ni. A chunga festival kan sawite hi kum dangah pawh Lammualah huaihawt a lo ni tawh ṭhin a, mipui pungkhawm an ṭhahnem a, traffic jam a nasat phah hle ṭhin.

Kumina Lammuala mipui punkhawmna hrang hrang huaihawt leh turah hian traffic jam a nasa phah leh viauin a rinawm. Kuminah chuan kum dang anga traffic jam a nasat lutuk loh nan leh traffic jam vanga mipuiin harsatna lian tham an tawh loh nan festival/concert huaihawttute an inhmakhua a, ruahmanna ṭha tak an siam lâwk a ṭul.

Mipui punkhawmna lian thamah hian police an duty ṭhin a, a ṭha; mahse, eng event emaw vanga lirthei che vel enkawl hi police tan buaipui vek sen a ni lo. Chuvangin, event buatsaihtu lamin mawh an lak ve a ngai a, lirthei che vel buaipuia enkawltu tur tam tâwk tak an indah ngei a ngai.

Tunah hian Aizawlah chuan veng eng emaw zatin kâwn leh khawlai an chei tawh a, mipuiin an tlawh ṭan tawh. Kâwn cheitu vengte'n mipui himna an ngai pawimawh tur a ni a, mipui himna atan ruahmanna ṭha tak an siam a, mumal taka duty an indah a ṭul. Kâwn chei entute'n an duh dan ang anga lirtheite an dah mai loh nan lirthei hûnna tur felfai taka an ruahman a ṭul bawk.