Minister of State rank

Mizoram sorkarin an flagship programme SEDP hnuaia board hrang hrang 14 a dina Vice Chairman-te chu protocol thilah minister of state (MoS) rank-ah dah an ni. Board chairman leh vice chairman-te hi MLA an nih chuan hlawh an neih belh tawh lo a, vice chairman zinga MLA ni lote chuan thla tin Rs. 40,000 an hlawh. 

Board vice chair­man-te chuan office an nei a, office staff atan LDC pahnih an nei thei a, pakhat chu personal assistant anga thawk tur a ni. LDC bakah hian group D staff pahnih an nei thei a; staff-te chu a zawm department-a thawktute aṭanga pawh tur a ni a, department-te hian pawh tur an neih loh chuan muster roll-in lak tur a ni a; board zawng zawngte chu pool vehicle pahnih pek tur an ni. 

Congress-in sorkarna vawn fung an chelh lai khan Parlia­mentary Secretary an ruat thluah a, sum tam tak luanralna mai niin eptu lamin an sawisel ṭhin. Chhan hrang hrang avangin Parliamentary Secretary-te kha tihtawp an ni a, an awm loh hnuah sorkar a chak loh sawt hriat a ni lo. Anni awmlai khan sorkar khan a chak phah viauna sawi tur a tam lem chuang lo. 

MNF hun a thleng a, anni lamin a hma aiin an uar emaw tih turin board hrang hrang an din a. Chutah chuan chairman-a Minister an neih duh tawk mai loin MLA leh MLA hluite chu Vice Chairman-ah an han vuah far bawk a. Anni hi Minister of State rank-a dah an ni. Board Vice Chairman leh an member ruatte hian hna han thawk tak tak se, Mizoramin hma a sawn phah dawn a nih chuan fak an hlawh ngei ang a, MoS rank-a dah ngei an phu thu hi an la sawi zui sup sup lo ang tih a sawi theih loh. 

Chutihlaiin tute emaw minister ni ta chiah lote MoS rank-a dah dan zawnna leh, MLA hluite tihlawmna hmanrua, board member-a tu tute emaw tihlawm tumna ang lek a ni palh ang tih a hauhawm a; MoS rank-a awm phak hial board lama Vice Chairman-te hian hna ṭha taka an thawh ngei hi an 'rank' pawhin a phût a, mipui pawhnin an beisei ngei ang.