Sorkar laipui biak pawh

Chief Minister chuan tun hnai khan India Prime Minister chu New Delhi-ah a kawm a, Mizoram mamawh hrang hrangte a sawipui a; ani bakah hian union minister dangte leh sorkar laipuia official pawimawhte a dawr bawk. 

Kan Chief Minis­ter hi a taimain sorkar laipui lam hi a be pawp fo a, a zuk zin chilh a, rei tak chamin Mizoram tan hna a thawk. A zin hmasak khan cham rei deuh mah se a thua fel taka thil rawn hawn kha a nei lo emaw ni, a 'vuak dûp' thu kha a rawn hawn a. Mi ṭhenkhatin fiamthu thawhna angin an sawi zui a, nimahsela state khat Chief Minister-in khatianga sorkar laipui dawra a feh chhuak vang vang tawh kha chuan kut ruakin a haw lo ang tih a chiang a ni. 

Tunah Prime Minister hial a zuk dawr ta a, minister dangte leh official pawimawhte a dawr zui leh bawk nen, kan state tana thil ṭha tak tak a rawn hawn ngeiin a rinawm. Kan Chief Minister chang ni loin kan minister dangte pawh sorkar laipui dawr turin an feh chhuak sung sung ṭhin hi a lawmawm a; kan state budget bei tham tak leh kan thawh chhuah tlem bawk si ngaihtuah chuan a sum bawm awmna lam kan biak ṭhat hi a pawimawh takzet a ni. 

Kan state hotute'n sorkar laipui an biak pawh hlawhtlinna tak tak erawh a rahah a hriat theih dawn a, rah ṭha tak chhuah ngei se tih hi Mizoram mipuite duhthusam a ni ang.