Hunpui rilru paiha thawh ṭan a hun

Kum 2026 kan chuang kai a, Vanglaini pawh kan chhuah leh ṭan ta. Chhiartu zawng zawngte kum thar chibai kan bûk che u a, kumin 2026 hi kum ṭha, hlawhtlinna leh malsawmna tam tak in dawn kum a nih theih nan duhsakna kan hlân e.

Kum a thar hian rilru a thar deuh sûrh hian a hriat a, mihringte hi kan phûr thar sawt tlangpui ṭhin. Kum thara phûrna thar awm ṭhin hi a ṭha zawng leh hmasawnna tur záwnga hman ṭangkai tum tlat a pawimawh.

Phûr hi a ṭha a, mihringte mamawh a ni. Hmasawn zel tur leh mawhphurhnate hlen tur chuan phûr a ngai a, phûrna tel lo chuan hmasawn a har ṭhin. Kum thar tìr lama kan phûrna ang hi kumtluana neih reng a harsa a ni mai thei a, chuti chung chuan, kan hna, kan tih tur leh kan mawhphurhnaahte intihphûr hram hram zel leh infuih ṭhin a ṭha.

Kum a thar hian kum khat chhunga thil tih tum, thlen tum leh tihhlawhtlin tumte mi tam takin an nei ṭhin.

Mi tam tak chuan tun kum tharah hian thil tum leh hmachhawp mumal tak an nei ang a, hmachhawp lian tak neite pawh kan awm ang. Chutih rualin, mi ṭhenkhat chu tum bik pawh nei lo, hmachhawp pawh nei lo an ni ang.

Tum mumal nei lo leh thlen tum bik nei lo tan hmasawn a har ṭhin a; tum neih loh hrim hrim hi hmasawn lo zia a ni. Kan tum leh kan thlen tumte chu duhthusam leh beisei ang taka kan tihhlawhtling lo a nih pawhin, tih tum bik neih leh tihhlawhtlin tum bik neih hi a pawimawh a, a ṭha hle.

Mizoram mipui hian tum mumal, thlen tum chin leh tihhlawhtlin tum bikte neih ila, mahni leh chhungkaw tan thil ṭha thlentu, hmasawnna min petu a ni ang.

Kum a thar a, hunpui rilru leh huau huau rilru paihin, mahni hna ṭheuh taima leh rinawm taka thawh ṭan a hun leh ta. Kum 2026 hi kum ṭha leh kum malsáwm a nih theih nan taima tak leh rim taka thawh a ngai a, kum tir aṭang hian bul ṭan ṭhat a pawimawh. 2026 hi Mizoram mipui leh hmun hrang hranga Mizote an kum ṭha, a vûr kum lo ni ngei rawh se.