Halpuah hâl, khapna leh khuahhirhna
Tun hnai December 31 zanah kum hlui thlahna leh kum thar lawmna atana hàlpuah hàl Aizawlah a nasa leh viau; khawpui dangahte pawh hâl ni mah se, Aizawl ang em em chuan a nasa lo deuh.
Aizawla hâlpuah hâl hi mi ṭhenkhat chuan 2024/2025-a hâl aiin a tlem zawk niin an hria a, ṭhenkhat chuan a nasa zawk niin an ngai ve bawk; awmna hmun leh veng azirin hmuh dan a inang lo thei ang. Engpawhnise, kum dang ang bawkin tun hunpuiah pawh halpuah leh a kaihhnawih thilte khap a ni a, kum dang ang bawkin mi tam takin langsar takin an bawhchhe leh bawk.
Halpuah hâl a nih hnuah kum dang ang thoin boruak a balh phah leh viau. December 31 thleng kha chuan Aizawl leh a chhehvel boruak a thiang mawi em em a, hmun hla tak thlengin a hmuh theih. Tunah erawh chuan kan chhehvel boruak a bâl leh tawh viau; tibâltute chu Mizote kan ni, kan ram mawina kan tichhia tihna a ni.
Kum hlui thlahna leh kum thar lawmna atana hâlpuah leh hâlmawi hâl hi khap hneh a harsa hle tih a takin kan tawng leh ta a, a harsat chhan ber chu mipui thinlung kan inhmin loh vang a nih a rinawm.
Krismas/kumthar vuakvêtah halpuah/halmawi khap a ni ziah a, mahse, nasa taka hâl a ni ziah tho. Kum 2010 bâwr vel khan kum hnih/khat chu Aizawlah hâl a ni lo a, kha kha sorkarin a khap hneh vang ni loin, media kaltlanga inzirtirna a ṭhat vang leh mipui rilru hmin vang a ni ber. Hei hian mipui thinlung hneh hmasak a pawimawhzia a tichiang.
Ram changkang zawkah kum thar lawm nan halpuah an hâl nasat thu an sawi ṭhin, a dikna chen a awm. Mahse, Mizoram angin mipui náwlpui, a duh duhin an hâl ve lo a, a titu tura ruat bikte'n hmun bikah an hâl tlangpui tih kan hriat a ṭha. Khuahkhirh loha zalên taka a duh duhin halpuah an hâl hi chu thil nih dan tur a ni lo, tihtawp dan tur uluk taka ngaihtuah a ṭul.
Engpawhnise, halpuah leh halmawi hâl hian ṭhatna a nei lo a, ṭhat lohna tam tak a nei zawk tih hi mipui hian kan chian tlan a ngai. Kan ram leh a chhunga cheng mipui bakah, ran thlengin hriselna atan a ṭha lo a ni tih kan hriat chian zel a ṭul a ni.