Mizoram leh milâr politics

A hun la chiang lo mah se, Aizawl Municipal Corporation (AMC) inthlanpui vawi 4-na a awm dawn hnai niin a lang; political party hrang hrang ngawrh takin an inbuatsaih mek a, candidate turte pawh an buaipui mek zel.

AMC inthlan turah hian political party zingah an candidate turte mumal taka puang an la awm lo chungin, bial (ward) ṭhenkhatah chuan candidate turte hriat a ni tawh. Candidate tura sawi zingah milâr, celebrity kan tih ang chi leh 'milar' tia sawi theih chiah loh, mi langsar bikte an awm nual dawnin a lang.

Mizoramah hian municipal emaw, MLA leh VC/LC emaw inthlanah milar leh langsar deuhte candidate atan sàwm chhuah an lo ni tawh ṭhin a, kumina AMC inthlan awm turah pawh an insáwm chhuak nual dawnin a hriat. Kan political party-te hian kum eng emaw ti kal ta aṭang khan 'milar politics' min khelhpui a ni.

Kan rama political party-te hian, a bik takin AMC inthlanah hian tlin duh luat vangin milâr an bawh lutuk em ni aw, tia ngaihtuah theih tak a ni. Mi ṭha leh hmangchâng hria, ram leh khawtlang hruainaa rintlak tur aiin, mipuiin an hriat rawn milâr, mipui hîp thei deuh tur an thlang ta mah mah niin a lang. Hei hi ram leh khawtlang tihhmasawn tumna aiin, tlin hrim hrim tumna vangah ngaih theih a ni.

AMC inthlana candidate tur chungchangah hian political party tinte'n uluk zawka ngaihtuahna an sên a ngai a; tlin duh luat vangin milâr leh langsarte bawh huam huam lo se, ram leh khawtlang tan a ṭha zawk ang. Milâr an ni emaw, ni lo emaw, mi ṭha, ram leh khawtlang tana ṭha taka thawk thei tur mi ngai pawimawh rawh se.

Mipui lam pawhin ngaihtuahna kan sên uluk a ngai; milârte hi ram leh khawtlang hruaitu atan an ṭha lo tura ngaih nghal ngawt tur a ni lo. Politics-ah hian milâr an nih avang maiin kan duh tur a ni lo a, kan duh lo nghal ngawt tur a ni hek lo. An lârna piah lam kan thlîr tur a ni a; an nihna dik tak, an thiamna leh theihna te, an rilru sûkthlêkte kan theih ang anga kan zir a, chumi aṭang chuan thutlukna kan siam a ṭha ang.