Kângmei lakah fimkhur zual a hun

Chief Minister chuan tun hnai khan kum thar 2026 pualin thuchah a tichhuak a; thil chi hrang hrang a sawi a, chung zinga langsar tak pakhat leh mipui tana pawimawh em em chu - ṭhál khaw ro hun a thlen leh nghal mai dawn thu leh kângmei laka fimkhur a ṭul thu a ni.

CM hian, "Ṭhál a lo thlen hian kângmei kan tuar a, lui lama kal tam takin vanduaina an tâwk ṭhin. Chuvangin, i fimkur tlang ang u," tiin mipui a chah. Hengte hi mipui inven fimkhurna tur pawimawh tak a ni a, CM-in a sawi vang chauh ni loin, mipui hian kangmeiin chhiatna rapthlak tak a thlen theihzia hre chianga kan fimkhur hle a ngai chho dawn a ni.

Nikum 2025 tawp lam aṭang khan hun eng emaw chen chu khua a ṭha a, ruah a sûr tawh lo. Khua a ro tial tial a, a la ro telh telh ngei bawk ang. Hetiang a nih avang hian mi tinte kângmei lakah kan fimkhur zual sauh sauh a ṭul chho dawn.

Tun aṭanga rei vak loah Mizoram pumah Kângmei Vèn Hapta (Fire Prevention Week) hman leh a nih a rinawm. Fire Prevention Week-ah mipiu zirtirna nasa taka kalpui ṭhin a ni a, chuvang chuan kângmei chhuak pawizia mipuiin kan hre tlangpui tawh. Chutih rualin, fimkhur loh vanga kângmei chhuak erawh a la awm zel tho.

Kuminah ṭhál kan hmang ṭan mek a, kan la hmang chho zel dawn a, eng ang takin nge kuminah hian ṭhál a nat dawn tih sawi lâwk theih a ni lo. Hmun ṭhenkhatah kângmei chhuak a awm leh ngeiin a rinawm bawk.

Tun aṭangin kângmei lakah mi tin kan fimkhur hle a ngai a, kângmei tichhuak thei thil ti lo tura kan invên a ṭul a, kan insûm a ngai. Lo hâl leh kângmei chungchangah pawh sorkar lamin thupek eng eng emaw a la tichhuakin a rinawm a, chungte chu mi tinin kan zawm ṭheuh a pawimawh ang.

Kângmeiin chhiatna leh harsatna a thlen nasat theihzia hretu kan ni. Kan in leh lo, kan neih ro hlute kan chàn loh nan chin tâwk awm lo khawpa kângmei laka kan fimkhur chhoh a ngai dawn; tun aṭangin mipui kan inhmakhua a ngai.