ADC-ah anti defection law a ngai

Lai Autonomous District Council inthlanpui vawi 12-naa vote tlate December 9, 2025-ah chhiar a ni a, MDC atana tlingte hriat vek a ni tawh. Mahse, tun thlengin LADC-ah hian sorkar a la ding thei lo. Result puan a nih aṭanga thla khat a liam hnuah pawh sorkar siam theih a la ni lo hi a zialo hle.

LADC term hmasa (2020-2025) khan sorkar a tlu chhên a, sorkar thar lak luh a ni fo a; CEM lak luh ṭum nga a awm hman. Term tawp lamah phei chuan sorkar mumal a ding tawh lo nghe nghe. LADC sorkar mumal awm thei lo kha hnathawhin a tuar a, thawktu (employee) tam takin an tuar a; a pawi em em.

LADC inthlanpui vawi 12-naah party mala sorkar siam thei an awm loh avangin sorkar inṭâwm a din a ngai. Result puan ni-ah INC leh MNF ten sorkar siam an tum tih a awm a; a hnuah MNF leh ZPM ten sorkar inṭâwm siam tumin legislature party an din a, mahse, a zûzî leh tawh.

Sorkar inṭâwm siam tuma hmalaknate a tlawlh chho zel hi a buaithlak hle mai a, a manganthlak hial tawh. Thil kal vel dan thlirin, LADC-ah hian sorkar nghet a ding mai rih dawn lo niin a lang. Tute party emaw thawk dunin, sorkar inṭâwm chu lo ding ta tehreng pawh ni se, rei tak a din rin ngam a har tawh.

District council sorkar a tlu fo tawh ṭhin; a chhan bera mi tam takin an ngaih chu, MDC-te rinawm loh vang a ni a, MDC-te rinawm lo tur vengtu tur anti-defection law a awm loh vang a ni bawk.

Tunah hian LADC-ah sorkar a ding thei rih lo a, CADC-ah mipui thlan sorkar a ding lo mek bawk. District council-ah sorkar nghet zawk a din theih nan leh MDC-te party danga an zuan lâwr loh nan anti-defection law an hman ve a ṭul ta hle tih a lang a; anti defection law an hman theih nan chak taka hmalak a ṭul tawh.

Anti defection law a awm emaw, awm lo emaw, MDC-te an rinawm a ngai. MDC nih hnua party danga luh kual vel hi MDC ni tura remchang siamsaktu political party leh thlang tlingtu mipui phatsanna a ni. Khawvelah hian phatsantu aia ngeiawm leh huatthlala an tam lo hle ang. Mi rinawm lo hi ram leh khawtlang hruaitu tlak an ni lo tih hriain, MDC-te hi thutlukna an lo siam tawhah an rinawm a ṭul tak zet a ni.