Social media kan hman dan

IPR Directorate leh MJA ten January 8, 2026-a kum thar 2026 puala hun an hmanhonaah IPR Minister-in fuihna thu a sawi a; social media-ah a thim zawng leh sawisel hrim hrim zawnga thil sawi (comment) a tam a, negative comment chungchangah insiamṭhat a ngaih thu leh, chanchinbumite'n mipuiah tih dan ṭha an tuh a ngaih thu a sawi.

IPR Minister thil sawi hi ngaihtuah zui tham tak a ni. Social media hrang hrangah sawiselna thu (post leh comment) a tam em em a, mi tam tak hi chuan sawisel tur leh dem tur an zawng hrim hrim em maw ni chu tih tur a ni.

Social media hian kan hnam leh khawtlang nun hi a tiṭha sawt nge, a tichhe zawk tih hi ngaihtuah tham tak a ni. Social media kan khawih hma hian Mizo hnam hian hun tam tak a lo paltlang tawh a, social media tel loin mihringte hi kan khawsa thei a, Mizo mipui pawh kan khawsa thei tih kan hre chiang.

Tunah social media kan hmang a, a tel lo chuan kan nung thiam tawh lo a ni ber. Social media hi a ṭangkai em em a, mi tam takin an hmang ṭangkai a, hlâwkna atan an hmang ngei mai. Chutih rualin, kan hman dan te, thu leh hla kan thehdarh dan te, ṭawngkam kan hman duh dante en hi chuan, Mizo khawtlang nun mawi tak te, nun dan ṭha leh ze mawi takte a tichhe tial tialin a lang.

Social media-a kan ṭawng chhuah hmain inngaihtuah nawn phawt ṭhin ila, social media hmanga kan Zo nun ze mawi tichhetu leh tihniamtu ni lo turin i fimkhur ang u. Sawi/post ka tum chu a ṭul rêng em, keimah leh mi dangte tan ṭhatna a awm em tihte ngaihtuah hmasa ila; tu tan maha ṭhatna leh hlâwkna awm lo leh mi rilru tina theitu a nih phei chuan ti lo mai ila a ṭha zawk.

Mizo mipui hi social media kan hman danah kan zavaiin kan fimkhur a ngai a, insûm leh inven kan mamawh vek mai. Tleirawlte leh ṭhalai, rilru la puitling tâwk lote hi vênpui an ngai a, a ṭul angin hunbi siamsak a ṭha. Rualú deuh zawk, pavalai rual kan tih ang chite pawh an fimkhur a ngai a, hmuh ang ang thawn chhuak chhâwng zel lo tura insûm a ṭul e.