Sorkara thawk doctor-te leh NPA

Mizoram Resource Mobilisation Committee member-te December 29, 2025-a CMO Conference Hall-a an ṭhutkhawmnaah, Mizoram sorkar Health & Family Welfare department-a thawk mek doctor 452 zingah private hospital/clinic-a thawk chunga Non Practising Allowance la an awm lo tih tarlan a ni.

Tarlan dan chuan, Mizoram sorkara a ngheta thawk doctor 452 zingah NPA la doctor 347 an awm a, an zingah private clinic/hospital-a thawk an awm lo. Doctor 105 chuan NPA an la lo hrim hrim thung.

Mizoram Health Services Rules, 2009 leh Mizoram Gazette angin, sorkar doctor, private practice-te tan NPA lak phal a ni lo a; private practice tur pawhin phalna lak a ngai.

Mizoram sorkara thawk doctor zingah private hospital/clinic-a thawk eng emaw zat an awm a, tun thlengin an la awm niin a lang. Kum kal tawhah Mizoram sorkara thawk nghet doctor zingah dan bawhchhia a, NPA la reng chunga private practice eng emaw zat an awm ṭhin. Chawm bawka háwp bawk a nihna lai a awm.

Sorkar doctor-te private practice leh NPA chungchangah tun sorkarin dinna mumal leh khawng tak a nei niin a hriat. Tunah chuan NPA la lo doctor an tam ta viau a, NPA la chunga private practice an awm loh thute kan hre ta. Doctor-te'n sorkar thu awiha hma an la hi a lawmawm a, dan loa thil an lo tih ṭhin tawhte an bànsan ta pawh an fakawm.

Doctor-te mi tin mamawh an nih avanga inluling nia ngaihna te, sorkar pawhin na takin a nawr ngam loa ngaihnate mi ṭhenkhat thinlungah a awm ṭhina sawi a ni. Hengte hi a reh chho zel dawn niin a lang.

Sorkar doctor thiam tak takte hi sorkara an hna piah lamah mipuiin an mamawh ve ṭhin a; chuvangin, private practice hi danin a phal lo a nih pawhin sorkarin a ngaihhnathiam theih a ṭha ve tho. Private practice chunga NPA lak erawh a lutuk ve leh bawk.

Doctor hna, damlo enkawl leh tihdam hna hi hna zahawm a ni a, Isua rawngbawlna nen a inhnaih bik tlat. Doctor hna zahawmna vawng nungtu tur chu anmahni doctor-te an ni a, timualpho theitu pawh anmahni a ni. Doctor-te'n dan zâwm chungin dik tak leh rinawm taka an thawh a, damlote an enkawl zel a ngai a ni.