Sorkarin mipui dah pawimawh ber se

Health secretary chuan tun hnai khan thuthar theh­darhtute kawmin, Health Care Scheme (HCS) kalpui turah sorkar leh private damdawi-in neitute thu a inhmuh theih loh avanga mipuiten harsatna an tawh loh nan sorkarin theihtawp a chhuah dawn tih a sawi. 

Tun hnaiah sor­karin HCS thar a tlangzarh a, mi­pui­in phur taka an lo nghah vei nen tlangzarh a nih hnu lawkah buainain a zui nghal. Non Government Hospital Asso­cia­tion of Mizoram (NGHAM) lamin rate thar hi an pawm thei lo a, sorkar lam an thu-ah ding nghetin heng damdawi-inte hi a pawmpuina (empanelment) a hlip zui ve bawk. 

Hetianga sorkar lam leh NGHAM an inrem theih loh chhunga a tuartu ber tur chu mirethei harsa zawkte an ni ang. Miin sum a neih na na na chuan an inenkawlna senso pek inhuam chungin private hospital-a awm pawh an thei mai a, chumi kawnga harsatna tawk tur chu a pawisa nei lote bawk an ni. 

Sorkar lamin thil awm dan hrilhfiah chiang tawh mah se NGHAM lamin ṭan chhan nei an inti ve tho bawk si a, a tawn tawnin mipui hma an ngai niin an insawi ve ve bawk si a, a buaithlak hle a ni. Engpawhnise sorkarin a ngaih pawimawh ber tur chu mipui a ni a, mipui tawrhna a thlen lohna turin a ṭul chuan huaisen takin ke pen se, a ṭul a nih chuan tlawm pawh hreh lo se. Mipui dah hmasain harsatna chinfel dan zawng rang rawh se.