HIV donaa ṭan lak lehzual

Mizoramah kum 35 chhung, November 2025 thlengin HIV vei mi 33,781 hmuh chhuah a ni a, HIV/AIDS vangin mi 5,026 an thi tawha chhinchhiah a ni.

April 2024 aṭanga November 2025 inkar, thla 20 chhungin mi 1,45,525 thisen endik aṭangin HIV vei mi 3,257 hmuh a ni a, HIV positive hmuh chhuah zat hi 2.24% a tling. Thla 20 chhunga HIV+ve hmuh chhuah zingah mipat hmeichhiatna hman aṭanga kai 70.4% lai an awm a, hriau hman aṭanga kai 27% an awm bawk.

India ramah Mizoram hi mihring cheng zat aṭanga chhûta HIV+ve tamna ber a nih thu sawi a ni ṭhin a, thisen endik zat aṭanga positive hmuh zat sanna ber state a ni. Tun hnai thla 20 chhunga endik zinga 2.24% lai HIV+ve an awm hi a sang hle a, a rapthlak ti pawhin a sawi theih ang.

HIV/AIDS donaah ṭanrual a ngaihzia sawi a ni tawh ṭhin a, mi tam takin kan hre tawh. Ṭanrual kan thiam tial tial pawhin a hriat a, mahse, hmasawnna tur kan la nghah hle àwm e.

State AIDS Control Society-te HIV/AIDS donaa an thawh ṭhat dan NACO-in a tehnaah Mizoram SACS chu kum 2022-23 khan 19-na, kum 2023-24 ah pasarihna, kum 2024-25 ah panga a ni a, kum 2025-26 chhungin pathum a ni. HIV/AIDS donaah Mizoramin hma a sawn zel tih a lang a, a lawmawm.

HIV/AIDS donaah Mizoram hi India rama ti ṭha ber pathumna a nih laiin, HIV vei hmuh chhuah zat erawh a tlahniam hleithei lo a, a pung zel emaw tih mai tur a ni. HIV chungchangah India rama ti ṭha pathumna nih hi a la tâwk lo tih a lang a, thawk ṭha ber nih a ngai. HIV hluarna ber state kan nih miau avangin HIV/AIDS donaa thawk ṭha ber state kan nih a ngai a ni.

Mizoramah HIV a tlahniam thei lo leh a hluar reng mai hi a manganthlak ta. HIV vei hmuh chhuahte kai chhan zingah mipat hmeichhiatna a sang lawr lak a, hei hian mi náwlpui nun a him lo tih a lantir tel.

Sorkar, kohhran, pawl, chhungkua leh mimal tin hian HIV/AIDS chungchanga kan ram dinhmun hi kan veia kan ngaimawh a ngai a; inen liam mai mai chi a ni lo tih kan hriata kan pawm a ṭul a ni.