Session atana inpuahchah lâwk

Mizoram Governor chuan Mizoram State Legislative Assembly pakuana session ṭhutkhawm vawi rukna chu February 17, 2026-a ṭan turin a ko a, budget session a ni nghal ang.

Session neih turin a awh chin tur hriat a la ni lo a, a awh chin tur leh hun hman dan turte chu Speaker kaihhruai Business Advisory Committee-in an la rêl dawn. Governor thusawi, zawhna leh chhanna, budget pharh leh sawiho, minister-te demand sawiho, bill pharh leh sawiho te chu a awm ngei ang a; MLA-te tun aṭanga an inbuatsaih a ngaiin a rinawm.

Assembly session hi mipuiin an thlir nasa tawh hle a, an thlir nasat piah lamah, a pawimawh lai leh duh laite awlsam taka lak chhuaha thehdarh theih a ni tawh. House member zawng zawngte an fimkhur a ngai a, an inzir peih a, an inbuatsaih ṭhat a ṭul.

Session neih tur hi MLA zawng zawngin tun aṭangin ur se, theihtawp chhuahin inpuahchah rawh se. Ram leh hnam tan ngaihtuahna nasa lehzualin han sêng se, a bik takin an bial ṭheuh tan theihtawp han chhuah lehzual se a ṭha hle ang.

Minister-te an inzir nasat lehzual a ṭul dawn a, an department dinhmun leh hmalaknate chiang taka an hriat a ngai. Zawhna awmte an chhàn mumal theih loh fo chuan mipui beisei an pha lo thuai dawn a, awlsam têa mualpho theih a ni. Tun aṭangin Chief Minister leh minister-te hi inzir nasa se, an department-te hre chiang hle rawh se.

Mizoram Assembly-a kan ram hruaitute rorel dan hi Parliament leh state dang assembly-a rorel dan ngaihtuah chuan a felfaiin a mawi hle. Hun hmasa lamah rorel theih loh khawpa inauh buaina leh kut inthlâkna hial lo awm ve zauh tawh mah se, hun rei tak chu hriat tur a awm tawh lo.

Hetih rual hian, ngaihtuahna sên tâwk loh vang te, ngaihsam vang te, taimak tâwk loh vangte emawa House-a inhnial buai lo an nih chuan ram leh hnam tan a ṭha ber chuang lo. Ram tana ṭha zawk turah chuan inhnial a ṭha a, awmze nei lo leh ram leh mipui tana ṭhatna awm chuang loa inhnial vak vak erawh a ṭha lo. Hei hi MLA zawng zawngin an hriat a ngai e.