Sawhthing sâwngbâwlna hmun

Mizoram Agricultural Marketing Board chuan Bána Kaih (Handholding) hnuaiah Horticulture Centre, Sairanga sawhthing sâwngbâwlna 'Ginger Processing Unit' an din a, January 13, 2026 khan Chief Minister-in a hawng.

Sorkarin sawhthing sawngbawlna hmun a din a, a taka hman theih a ni ta hi a lawmawm. He hmun hi sawhthing thartute tan hlâwk lehzualna thlentu leh ram tan thil ṭha zawk thlentu ni thei se a duhawm a; chutiang tur chu a enkawltute leh mawhphurhna neite'n taima leh rinawm taka hna an thawh a ngai dawn a ni.

Tun hmain Mizoramah kut hnathawktute thil thar chhuah dahṭhatna leh sâwngbâwlna tur khawl bun a lo ni tawh ṭhin. Mahse, tam tak chu awmze neia enkawl a ni lo a, a nih tur angin hman ṭangkai a ni lo a, a awm ṭáwl mai mai a; a uiawm ṭhin.

Ginger Processing Unit kan neih thar hi hlâwkna thlentu ni turin a tak taka hman ṭangkai ngei ni se. Hman ṭangkai a nih phawt chuan sawhthing thartu Mizoram hmun hrang hranga kut hnathawktute tan hlâwkna leh hmasawnna thlentu a ni ngei ang. A enkawltute tan pawh hlâwk tham a nih ngei a beiseiawm.

Sawhthing sawngbawlna hi ṭangkai taka hman a nih a, kut hnathawkutte'n an hlâwkpui theihna tur chuan a enkawltute an pawimawh. A enkawltute hian an beisei ang takin hlâwkna an hmu mai lo a nih pawhin, dawhthei taka an enkawl a, sawhthing an sawngbawl ṭâng ṭâng a ngai ṭhin ang. A ṭul ang zelin hlâwkna tak tak an hmuh hun thlirin an teirei peih tur a ni.

Ginger Processing Unit hawnnaah hian CM chuan, sawhthing avangin chhungkaw tam takin sum leh pai tam tak an lak luh thu te, tun hmaa a thlâwna sum sem ṭhinin Mizo rilru a tihpiansual thu te, a thlâwna sem an tihtawp avangin mipui rilru puthmang a siamṭhat mek thu te, thawhrim rah têl chu a hlut bik thute a sawi.

CM thusawi hi a dik viau mai. Kut hnathawktu, sawhthing chingtute'n an thawh rim rah téla sum tam tak an la lut hi an lawmpuiawm a, remchanna siamsaktu sorkar hmalakna a lawmawm. Sawhthing aṭang hian inzir ila, Mizoram mipuite'n thawhrimnaah hian hlâwkna a awm tih hriain, a thlawna sum dawn tumna rilru pu loin, thawh chhuah tumna rilru pu zel tawh ila a duhawm.