Mipuiin an thlamuanpui tur police-te

Methamphetamine lem leh gelatin detonator hmanga inbumna leh pawisa inchhuhsak luihnaah police pali an inhnamhnawih ṭhin tih kum 2025 tawp lam khan hriat chhuah a ni a, police palite chu man an ni a, an thurualpuite pawh man an ni.

Aizawl SP sawi danin, thil sual tihnaa inhnamhnawiha puh police-te leh an thurualpuite chu jail-ah dah luh an ni. Mahse, court-in bail a phal avangin bail-a chhuahtir leh vek tawh an nia sawi a ni bawk. Thil ṭha lo tak titute police-in an man chhuak hi a lawmawm a, an police-puite an nih avanga hum tum loa hma an la pawh a lawmawm.

Thil dik lo leh pawikhawihnaah police pali lai an inhnamhnawih hi a zialo hle mai a, a pawi. Police tan phei chuan a zahthlak a, a hnam ang pawhin a zahthlak tel. An thil tih avang hian mipui rilru-ah police rin loh phahna a awm phah a hlauhawm.

Mipui náwlpui rilruah chuan police-te thil sual titute mantua ngaih an ni a; a dik rêng a, thil sual titute leh pawi khawihte an man ṭhin a ni. Hei vang hian mi tam tak rilruah chuan, police-te chu thil dik lo leh thil sual ti ve lo tura ngaihna pawh a awm ṭhin. Mi tam takin police-te hi thil sual ti ve ngai lo turah an ngai tih tak hi police-te'n an hriat reng a ṭha.

Police-te hi misual mantu chauh ni loin, thil sual tih leh pawikhawihna thleng thei leh buaina chhuak thei vengtu an ni a; a ṭul angin puih ngaite puitu tur an ni bawk. He an nihna hi anmahni police-te leh mipuiin kan hriat tlan a pawimawh.

Police-te hi mipuiin an thlamuanpui turte an ni a, mipuiin an thlamuanpui theihin an awm tur a ni; rûi thle mai mai tur leh, pawi khawihnaa inhnamhnawih ve tur an ni lo. Police zingah ruih theih thil ṭhin mi eng emaw zat an awm a, phat tur a awm lo; ruih theih thil kaihhnawiha thi pawh eng emaw zat an awm tawha sawi a ni.

Ruih theih thil ti ṭhinte hi mi dang tan thlamuanpui an har a, mi tana hnawk an ni zawk fo. Police zinga ruih theih thil ti ṭhinte pawh an thlamuan tur mipui tan thlamuanpui an har viau ang. Chuvangin, police zinga ruih theih thil ti ṭhinte an inenfiah a, sim an tum ngai; an sim theih nan thuneitu lamin a ṭul anga hma an lâkpui a, thununna khauh zawka an lek pawh a ṭul ang.