College principal atan 'qualify' ngei

India rama university leh college lama thuneitu sang University Grants Commission (UGC) danah chuan, kum eng emaw ti kal ta aṭang khan sorkar college-a principal turin doctorate degree (PhD) a ngai a; tih ngai leh nih leh neih ngai a awm nual bawk. Mahse, Mizoram sorkar hnuaia college zawng zawng deuh thawah UGC dan zawm a ni lo.

Mizoramah sorkar college 20 chuang a awm niin an sawi. Sorkar college zawng zawng deuh thawah UGC dan ang takin PhD nei, principal atana qualify lote principal angin an awm nia sawi a ni a; sorkar mawh a ni.

College principal nghet ni turin PhD nei an ngaih si avangin Mizoram sorkara college tlemtê chauhin principal nghet an nei a; college tam berin hun rei tak principal nghet an nei lo tawh a, principal phuahchawp hoin an kal tihna a ni. Dan ang taka principal nei ṭhinte pawhin an nei leh tawh lo hlawm.

 School, college leh university-ahte zirtirtu atan qualification-a tling ngei kan duh a, chutiang tur chuan hmalak a ni ṭhin a, nawrna pawh a awm fo. Qualification-a tling lo chunga college-a zirtirtu hna thawk mi 30 vel pawh pawl ṭhenkhat leh mipuiin an ngaimawh em em a ni.

Zirtirtu ai mahin zirna-ina a lu ber an pawimawh a, college-a assistant professor aiin principal an pawimawh zawk mah ang. Zirtirtu atan qualify ngei neih a pawimawhna ai mahin, principal atana qualify ngei dah a pawimawhna a sang mah ang.

Tuna sorkar kal dan, college tam taka zirtirtu zinga a senior ber principal atana dah ringawt zel hi a dik lo a, dan lo a ni. Principal nghet nei lo a, phuahchawp principal awmtir reng hi a ṭha lo. Hetiang zel a nih chuan dan anga kal a, PhD nei ngei principal atana dah tik ni a awm lo ang.

Mizoram sorkar hnuaia college-te'n qualified principal an neih ngei theih nan tun aṭanga hmalak a ṭul. Hei hi Mizoram zirnain hma a sawnna atan leh college hmasawn leh ṭhanna atan a pawimawh.

Mizoram college-a thawk mek zingah college principal ni tura qualification-a tling zân, PhD nei leh service-ah pawh tling tawh mi tam tak an awma sawi a ni. Sorkar hian huaisen takin hma la se, college tinah hian PhD nei, qualify ngei principal atan dah rawh se.