AMC inthlan tihkhawtlai ziah hi

Aizawl Municipal Corporation sorkar ding mek hi March 1, 2026-ah a tàwp dawn a, chuvang chuan 2026 tìr lamah AMC inthlan a ni tura ngaihna a awm. Mahse, State Election Commission (SEC) chuan AMC sorkar hun tawp hmain inthlan a nih dawn loh thu leh kumin April/May velah buatsaih theih beisei a nih thu January 16, 2026 khan a sawi chiang.

AMC sorkar ding mek tawp hmaa inthlan buatsaih theih loh chhana sawi chu - Assembly session neih dawn vang leh HSLC leh HSSLC exam vang tihte a ni a; financial year a tàwp dawn hnaihah sorkar hnathawkte an buai tih sawi a ni bawk. Chhuanlamte hi a àwm viau thei a, a àwm lo thei bawk; pumpelh theih leh siam rem theih a nih a rinawm.

AMC inthlan dawn apiangin tihkhawtlai a ni. Inthlan hmasa ber (2010) kha tihkhawtlai a awm thei lo a, inthlan vawi hnihna (2015) kha tihkhawtlai a ni. Inthlan vawi thumna pawh 2020 kum tawpa neih tur ang ni mah se, February 16, 2021-ah neih a ni. Vawi lina pawh tihkhawtlai a ni leh dawn ta.

State-ah political party pathumte sorkar laiin AMC inthlan a awm vek a, tihkhawtlai vek a ni dawn ta. AMC inthlan tihkhawtlai chungchangah party pathumte hi indem tur bik an awm lo. Inthlan tihkhawtlai hian chhan a nei vek a, a chhan erawh a inang lo.

AMC inthlan dawn apianga tihkhawtlai a la ni ṭhin hian dan bawhchhiat a nei loa sawi a ni. Chuti chu ni mah se, sorkar hun a tawp hma ngeia inthlan buatsaih a, Bawrhsap kuta AMC dah ngai lo tura a hun taka sorkar thar din hi a nih dan tur zawk a ni ngei ang.

A hun pangngaia AMC inthlan buatsaih loh ṭhin hian thuneitute'n AMC an ngaih pawimawh lohzia leh hmuh nêpzia a lantir a; chu chuan mipui thinlungah ram leh khawtlang rorelnaah municipality a pawimawh tak tak loa ngaihna te, AMC ngaih pawimawh lohna te a neihtir ngeiin a rinawm.

Hun lo la kal zel turah chuan AMC sorkar hun tawp hma ngeia inthlan buatsaih ni tawh se a duhawm. AMC sorkar hun leh inthlan hun a mumal loh chhan hi AMC dan a ṭhat tâwk loh vangah a ngaih theih a; siam ṭhat theih ni se a duhawm hle bawk.