Ramri hung a ṭha nge ṭha lo?

India sorkarin India (Mizoram) leh Myanmar ramri hung a tum duh loin MZP leh Zo Re-Unification Organisation chuan January 16, 2026 khan Vanapa Hall kawtah punkhawm an huaihawt. Ramri hung an duh loh thu Governor kaltlangin Prime Minister hnenah an thehlut nghal bawk.

ZORO leh MZP hian ramri hung an duh loh thu an lo aupui tawh ṭhin a; ZORO phei chuan hmun hrang hrangah ramri hung duh lohna an lo lantir tawh.

February 28, 2024 khan Assembly House-ah ramri hung duh lohna leh Free Movement Regime ṭhiah duh lohna resolution pawm a ni a; tun thlengin a la ding. YMA, MUP, MHIP, MZP leh MSU telna NGO Coordination Committee pawh 'ramri hung loh' hi an dinna a ni.

Mizoram leh Bangladesh ramri hung a ni tawh a, dodalna a awm lem lo. Mizoram leh Myanmar ramri hung erawhin thawm a nei lian hle a, dodalna a awm nghal.

Ramri hung duh lotute hi Mizoram sorkar, NGO Coordination Committee leh pawl dangte an ni. Pawl anga ramri hung ṭha ti an awm mai thei a, an awm a nih pawhin, Mizo mipui huap zo tak pawl an ni lo a ni mai thei a, an thâwm pawh a ring vak lo niin a lang.

Mizoram mipui zingah Mizoram-Myanmar inrina hung ṭha ti lo tam tak an awm a, hung ṭha ti leh duh tam tak an awm bawk. Ramri hung duh nge duh lo tam ang tih inzawt ta ila, chhan harsa tak a ni. Social media aṭanga thlir chuan, ramri hung duhna thâwm a ring phian a, mahse, social media-a thâwm ring apiang hi Mizo mipui tam ber rilru erawh a ni kher lo.

Ramri hung hi Mizoram leh Mizo hnam tan a ṭha rêng em tih hi a pawimawh a, fîm taka ngaihtuah a ṭul. Thil tihdanglam leh mai harsa tak a nih theih avangin tun hun chauh kan thlir tur a ni lo a, tun aṭanga kum 20, kum 50 leh chu aia tam pawh kan thlir tel a ṭha.

Mizoram leh Myanmar lama Mizote hi hnam khat kan ni a, ram hrang ni mah ila Mizo hnam kal zel tur ngun taka ngaihtuah chungin ramri hung chungchangah hian ngaihdan leh thutlukna kan siam a ngai a ni.