University campus din chungchang
Champhai Joint NGO hruaitute chuan January 17, 2026-a press conference an neihah, Champhaiah Mizoram University emaw, state university emaw Eastern Campus dah an phût thu te, Eastern Campus dah a nih loh pawhin Champhai College-ah master degree tal zirna dah turin sorkar an phût thute an puang.
An thil phût chungchangah hian Champhai Joint NGO hruaitute chuan, "A ṭul ang zelin kan nawr dawn," an ti. Champhai district-a MLA-te chu na zawka ṭang ve turin an phût bawk.
Champhai District NGOCC chuan November 26, 2025 khan CM hnenah state university din turah Champhaiah eastern campus din tura ngenna an thehlut. State university din tura eastern campus din tura an dil mek laiin, tunah MZU Eastern Campus din an phût leh ta.
Champhai Joint NGO hian an thil phût hi anni chuan âwm an ti a, mahse, media lama sawi zui dan aṭang chuan mi tam ber chuan àwm an tihpui lo niin a lang.
Lunglei lam MLA-te bàn hial huama an ṭang na ngam anga Champhai district lama MLA-te ṭang na ve tura an phûtnaah hian, bàn ngam khawpa ṭang na ve turin an MLA-te an beisei tihna a ni thei àwm e. "A ṭul ang zelin kan nawr dawn" an tih hian eng chin nge a kawh hriat a ni lo a, lungawi lohna lantir chiamte pawh a kâwk tel mai thei.
MZU hi state sorkar hnuai a ni lo a, hmun (area) bik atana thil ti tura nawr chiam chi a ni lo mai thei; uluk taka ngaihtuah a ṭha ang. MZU nawrna atana bàn hial ngam tura MLA-te phût pawh a fuh lo thei.
Champhai NGO-te hian Champhaiah state university eastern campus din an lo phût tawh a, hei pawh hi a la hma deuh. Dan tihdanglam leh phawt a ngai a, tunah chuan dan a la awm lo ang a ni. State university din ṭan chu sawi loh, university dinna tur dan pawh a awm hmaa campus din lo sawi nghal ngawt hi chu a la hma mah mah a ni.
Mihring ziaah hian mahni inhmuh len te, inhmuh ṭhat te, àwm leh phú riaua inhriatte a awl a; chumi avang chuan kan nihna dik tak kan hmu fuh lo fo. Kan ngaihdan leh inhmuh dan piah lamah, mi ngaihdan leh hmuh dan te, kan nihna dik takte thlir tel thiam a pawimawh khawp mai.