State páwna Chapchar Kût zawrh

Mizoram hmun hrang hrangah loneitute'n chap an nghak chár mek. Chap nghah chàr lai a nih angin, Chapchar Kût pawh a hnai leh ta. Nikum lam khan Chapchar Kût 2026 Organising Committee an lo ṭhu tawh a, January 20, 2026 khan CM hoin an ṭhuk leh bawk a; Kût hman dan tur an tichiang tawh niin a lang.

Mizo kût ropui ber hmang tur hian thla khat chuang inbuatsaihna hun a la awm. Thla khat chuang hun la awmah hian mawhphurhna neite'n ṭha taka hma an lak a, an inbuatsaih i beisei ang.

Chapchar Kût hi khualzin hîp luh theihna remchang ṭha a ni a, chuti zawng chuan Kût hman dan tur ngaihtuahtute pawhin rilru an put a rinawm. Chutih rualin, Kût hmanga khualzin hîp lut turin engtin nge a ngaihtuahtute lamin ruahmanna an siam hriat a ni lo; ruahmanna ṭha tak an lo nei tawh a ni thei a, an ngaihtuah thleng pha lo pawh a ni thei.

Kan kût ropui ber hmanga khualzin tam zawk Mizorama hîp lut tur chuan hnam dangte'n Chapchar Kût hi an hriat a ṭul a, an hriat theih nan hmalak a ngai. India ram chhung leh pawna mite'n Chapchar Kût an hriat theihna tur chuan an hmuh ngei tura puanzar a ngai a ni.

Hnam dangte'n Chapchar Kût an hriat theih nan Mizoram páwna khawpui lian pakhatah tal zuk inpho chhuah ve ṭul. National media-te hman ṭangkai thiam a, an hmaa zuk inlan pawh ṭha hle ang. Hei hi sorkar leh Kût huaihawttute'n an thlir phâk a ngai a, sum sên belh hret a ngai a nih pawhin an huam ve a ngai. Advertisement emaw, press conference emaw, thil dang hmang emawin tih theih a ni.

Zin khawthawng tur hian hun rei lo te chhunga thil tih zung zung theih a ni lo a, a hma fê aṭanga insiamrem leh inruahman lâwk a ṭul ṭhin. Chapchar Kût pawh hi state pawn lam mite'n a hma fé aṭanga an hriat lâwk a, kal tura an inruahman lâwk ve a ngai ang.

Kan Kût ropui ber hi a hlawhtlin zawk theih nan leh hnam dang khualzin tam zawkin an chhim ve theih nan Chapchar Kût thlen nana thla khat chuang hun la awmah hian thuneitute'n awmze nei taka hma an lak a ngai e.