Biak-in leh hnam dang khualzin

January 20, 2026 khan Tourism Minister-in kohhran pawl eng emaw zat intêl khawmna Council of Churches in Mizoram hruaitute a kâwm a, Mizorama khualzin pung mekin kohhran leh biak-in a nghawng dante leh a kaihhnawihte a sawipui.

Minister chuan, biak-inte chu state pâwn aṭanga khualzin rawn lutte'n tlawh an châk zingah a tel thu te, biak-in chhunga awm dan tur leh inthuam dan tur an hriat theih nan hmalak a pawimawh thu te, biak-ina lo dawnsawn dan tur tâwk hriat a pawimawh thu leh, kalphung mumal zawk neih a ṭul thute a sawi. Kohhran leh biak-in zahawmna ngai pawimawha hetianga hma a la hi a lawmawm.

September 2025-ah Sairang thlengin rêl a rawn lut a, nasa takin khualzin an pung. 2025 Krismas vuakvêtah pawh Mizoram, a bikin Aizawlah hnam dang khualzin tam tak an awm a, khualzin eng emaw zat chuan biak-ina inkhawm an chhim a ni. Biak-ina awm dan leh tih dan phung ngaichâng thiam tak an awm laiin, mit tikham thei zawnga che vêl an awm bawk.

Mizoram hi India rama biak-in tamna ber leh inkhawm nei tamna ber a ni hial mai thei. Hei hi India rama state dangte leh hnam dangte laka kan danglamna a nih avangin, hnam dang tan biak-ina kan inkhawm hmuh châkawm tak a ni thei a; inkhawm chhim duh an la pung zelin a rinawm.

Khualzin pung nasa hian a ṭha lam leh a chhe lamin nghawng a nei lo thei lo a, a nghawng theih zingah kohhran leh biak-in pawh a tel. Chuvangin, biak-inah awm dan tâwk an thiam theih nan, hnam dang khualzinte lo dawnsawn dan tur leh tih dan tur lo neih a ṭha, tun aṭanga hmalak a ngai.

Mizoramah khualzin an rawn pung zelin a rinawm a, rilru leh lang thei thilah kawng tinrengah, ho têa ngaih thlengin lo inbuatsaih ṭhat a pawimawh. Hnam dang khualzinte'n kan hmun serh biak-inte pawlawh taka an rawn pal loh nan ruahmanna mumal neih a ṭul a; a theih phei chuan kalphung inang tlang deuh neih pawh a ṭha ang.

Tourism department lam pawhin khualzin a tam thei ang ber hîp lut tura ṭan an lak rual hian, kan biak-inte leh kan serh leh sângte humhim tel zawnga hma an lak a ṭul.